ГӘДОУҬА, ԥхынгәы 22 – Sputnik, Бадри Есиава. Ԥхынгәы 22 рзы Гәдоуҭа араион ахада Баграт Боџьгәуа сынтәатәи ашықәс актәи азбжазы инагӡоу аусурақәа ртәы дазааҭгылеит Аԥсны ахада дызлахәыз аиԥылараҿы.
Гәдоуҭа араион абиуџьеттә лагалақәа фымзтәи рыплан нагӡоуп 144,3% рыла, абиуџьет иаланагалеит 271,5 миллион, планла 188 миллион мааҭ ахьазгәаҭаз.
Араион ахатәы биуџьет алагалақәа 109,8 миллион мааҭ ыҟоуп, ареспубликатә биуџьет аҟынтәи ацхыраара – 99,6 миллион мааҭ.
"2022 шықәса ажьырныҳәаахыс аныхрақәа 308 миллиони 947 нызқь мааҭи дыртәеит. Араион ахашәалақәа рҟынтәи аныхрақәа - 147 миллиони 447 нызқь мааҭи дыртәеит", – иҳәеит Боџьгәуа.
Ауалафахәы азы аҳәынҭқарратә цхыраара иартәеит 99,6 миллион мааҭ иҳәеит иара.
Ахада ифонд аҟынтәи 62 миллион мааҭ рзырхан:
Аԥсабаратә рыцҳараан аԥхасҭа зауз материалтә цхыраарак аҳасабала – 46,8 миллион мааҭ;
Акоронавирус аҿагыларазы Гәдоуҭатәи ахәшәтәырҭахь цхыраарак аҳасабала – 14,6 миллион мааҭ;
Аҽыҩқәа рныҟәгараз – 350 нызқь мааҭ.
Араион аҟны аремонт-ргыларатә усурақәа ирыхҭынҵоуп 31,9 миллион мааҭ.
Аҭыԥантәи абиуџьет аҟынтәи ақалақь ахаҿра аиҿкааразы аусурақәа мҩаԥган: ашьаҟауаа рныҟәараз 620 метра ахаҳәцәы ықәҵан, Тарнаа имҩаҿ 1,3 километр акаҭран ықәҵан, Гобечиеи Абазақәеи рымҩаҿ автобусаангыларҭақәа ргылан.
"Аԥсны Афырхаҵа Д.В. Кәарацхьелиа ихьӡ зху астадион-маҷ аремонт цоит, лассы ихыркәшахоит. Аплиажтә зонаҿы аҽеилаҳәарҭақәа жәаба ргылахоит, амшын ихҵоуп аԥкыгақәа, урҭ даҽа 50 цыра аахәахоит, иахьазы Бамбора иахьаҵанакуа аплиажтә зонаҿгьы амшын рыхҵара иаҿуп", – иҳәеит араион ахада.
Имҩаԥгоуп ахаҳә зқәыԥсоу Лыхны, Дәрыԥшь, Мҵара, Приморское, Ԥсырӡха, Бармышь рымҩақәа рремонт.
Иахьазы аремонт иаҿуп Дәрыԥшь ақыҭа ахадара ахыбра. Апроект ахәԥса – 1,2 миллион мааҭ.
Иазԥхьагәаҭоуп Гәымсҭатәи амҩаҿы 10,7 миллион мааҭ итәо акаҭран ақәҵара.