АҞӘА, ԥхынгәы 25 - Sputnik. Запорожтәи аобласт астатус азы ареферендум цәыббрамзазы имҩаԥгахар алшоит ҳәа аҳәамҭа ҟанаҵеит РИА Новости, Запорожтәи аобласт анапхгаратә хеилак аиҳабы Владимир Рогов иажәақәа шьаҭас иҟаҵаны.
Рогов иҳәеит Запорожтәи аобласт аҿы ареферендум Херсонтәи аобласт аҿы ареферендум амҩаԥгара аамҭа инақәыршәаны имҩаԥгахар ҟалоит ҳәа.
"Иҟалоит аобластқәа рыҩбагь рҿы ареферендум еицымҩаԥгахар. Уажәы херсонтәи ҳколлегацәеи ҳареи аконсультациақәа мҩаԥаагоит, ҳаӡәыкны ҳақәгылоит. Ари зеиӷь ыҟам вариантуп. Аусмҩаԥгатәқәа зегьы ашәарҭадаратә ҭагылазаашьа иахьырԥшхоит", - иҳәеит иара.
Рогов иажәақәа рыла, даҽа комиссиакгьы аԥҵоуп Енергодар. Аоперациа ҷыда амҩаԥгараан урыстәылатәи аруаа Херсонтәи аобласти Украина аладахьы иҟоу Запорожтәи аобласт Азов иаԥну ахәҭеи рнапахьы иааргеит. Арегионқәа рҿы арра-граждантә напхгарақәа аԥҵоуп, урыстәылатәи ателеканалқәеи арадиостанциақәеи ддырбо иалагеит, Ҟрыми дареи рыбжьара ахәаахәҭратә еимадарақәа реиҭашьақәыргылара иаҿуп. Аԥарашәара амааҭ ахь маҷ-маҷ ииасуеит, урыстәылатәи аимадара аус ауеит.
Зых иақәиҭтәу аобластқәа Урыстәылатәи Афедерациа иалаларц шырҭаху азы аҳәамҭақәа ҟарҵахьеит. Ауааԥсыра урыстәылатәи атәылауаҩшәҟәқәеи аиразы аршаҳаҭгақәеи роуразы азыҳәақәа ҟарҵоит.