АҞӘА, цәыббра 3 - Sputnik. Атомтә фымцамч азы Жәларбжьаратәи амаҵзура (МАГАТЭ - урысшә.) аҟазауаа Запорожтәи Атомтә фымцастанциаҿы иҟазаауеит цәыббра 5 рҟынӡа, абри атәы аанацҳауеит РИА Новости аиҿкаара "Ҳара Урыстәыла ҳадгылоуп" ахантәаҩы, Запорожтәи аобласт ахадара ахеилак алахәыла Владимир Рогов иажәақәа ааганы.
"Атомтә фымцамч азы Жәларбжьаратәи амаҵзура амиссиа атомтә станциаҿы аусура иацнаҵоит. Урҭ цәыббра 5 рҟынӡа аус рулоит. Дара ирҭаху аинформациа зегьы рырҭоит", - рҳәеит амаҵзураҿы.
Аобласт ахадара ахаҭарнак иазгәеиҭеит жәларбжьаратәи аҟазацәа ирҭааит ажурналистцәа ҩажәижәаба тәыла рҟынтәи. Рогов иҳәеит аобласт ахадара зегь рзы ишаарту, зегьы алшара шрымоу обиективла астанциаҿы иҟоу аҭагылазаашьа атәы аарԥшра.
Еиду амилаҭқәа реиҿкаара иатәу амашьынақәа жәбеи урҭ зыхьчоз машьынақәаки Запорожтәи Атомтә фымцастанциахь иааит цәыббра 1 азы. Аделегациа дахагылоуп Атомтә фымцамч азы Жәларбжьаратәи амаҵзура аиҳабы Рафаель Гросси. Амиссиа хықәкыс иамоуп Киев аганахьала астанциа иахьаиеихсуа иаиуз аԥырхага ахәшьара, акатастрофа ҟамларц азы аусура амҩаԥгара.