АҞӘА, абҵара 16 - Sputnik. Аԥыза-министр ихаҭыԥуаҩ, афинансқәа рминистр Владимир Делба аԥыза-министр Александр Анқәаб иҿаԥхьа аремонт-еиҭашьақәыргыларатә уснагӡатәқәа рымҩаԥысшьазы абжьаратә ҳасабырба ҟаиҵеит, абри атәы аанацҳауеит Аминистрцәа реилазаара апресс-маҵзура.
Владимир Делба иажәақәа рыла аԥара рацәа рзоужьын агәабзиарахьчареи асоциалтә цхыраареи. Иаку аматериалтә цхыраара рыҭан 1138-ҩык атәылауаа, уи 74,5 миллион мааҭ иартәеит.
327-ҩык рыхәшәтәра иазоужьын 86,8 миллион мааҭ, 37 миллион мааҭ азоужьын аҷаҷачымазара змоу ачымазцәа рыхәшәтәразы. Ахатә биуџьет аҟынтә ахәшәқәеи амедхархәагақәеи - 98,7 миллион мааҭ рыхәа аахәан.
Делба иҳәеит аԥснытәи астудентцәа 153-ҩык урыстәылатәи аҵараиурҭақәа рҿы рҵараҵара иахшәаан 28,6 миллион мааҭ.
Арезервтә фонд аҟынтәи 39 хыбра реиҭашьақәыргыларазы 85 миллион мааҭ азоужьын.
Делба иажәақәа рыла аԥсабаратә рыцҳарақәа рыхҟьаԥҟьақәа раԥыхра иазынашьҭын 225 миллион мааҭ, 145 урҭ рҟынтәи атәылауаа рыԥхасҭа иахшәаан, 80 миллион мааҭ – аремонт-еиҭашьақәыргыларатә усурақәа.
Иара убасгьы иҳәеит аминистрра шазыхио Очамчыра араион аҿы аԥсабаратә рыцҳарақәа рыхҟьаԥҟьақәа раԥыхра. Ацхыраара роуеит 116-ҩык. Уи иазоужьхоит 11 миллион мааҭ.
Делба иҳәеит уажәазы аиҭашьақәыргыларатә усурақәа шцо 18 ҩны рҿи, Аҟәеи, Аҟәеи Гәылрыԥшьи араионқәа рҟны 6 ҵаратә усҳәарҭак рҿи. Аремонт иазоужьуп 45,6 миллион мааҭ.
217 миллион мааҭ рыхә аремонт-еиҭашьақәыргыларатә усурақәа мҩаԥысуеит 73 социал-культуратә хыбрақәа рҿы.
Афинансқәа рминистр аԥаразоужьра ззухо аусурақәа еиқәиԥхьаӡеит:
Ҷлоу ақыҭа акультура Ахан ахыбра аԥсахра - 9 миллион мааҭ;
Гәылрыԥшь араион Кациқыҭ ақыҭан ацҳа аиҭашьақәыргылара - 8,5 миллион мааҭ;
Очамчыра араион Лабра ақыҭан ацҳа аиҭашьақәыргылара - 5,8 миллион мааҭ;
Очамчыра араион Џьгьардеи Кәтоли ақыҭақәа рҿы аӡышьҭрақәа ррыцқьара - 15,6 миллион мааҭ;
Гәдоуҭа араион Аҷандара ақыҭан аӡышьҭра арыцқьара - 5,3 миллион мааҭ.