АҞӘА, абҵара 19 - Sputnik. Ақыҭанхамҩа аминистр Беслан Џьопуа аҳәынҭпрограммала инагӡоу апроектқәа рымҩаԥысшьа гәеиҭеит Очамчыреи Гәылрыԥшьи араионқәа рҿы ҳәа еиҭарҳәеит Аԥсуа телехәаԥшра аефир аҿы.
Аминистр даҭааит Бабышьра ақыҭаҿы еиҿкаау аԥсаатәааӡарҭа. Иара аҳәынҭпрограммала иазоужьын 4 млн 100 нызқьмааҭ. Арҭ аԥарақәа рыла иргылан аферма, иаахәан аԥсаатә, иара убас афатә. Аферма аусура иалагеит, ара ирааӡоит акәтқәеи ашәишәиқәеи. Аԥхьаҟа иазгәаҭан ирымоуп аԥсаатә аҭыԥ аҿы ишьны, ирыцқьаны аҭира азырхиара.
Ақыҭанхамҩа аминистр Беслан Џьопуа ари апроект қәҿиаратәуп ҳәа ахиҳәааит.
"Аҭира иазырхиоу атауар ыҟоуп. Асеиԥш хԥа-ԥшьба проект атәыла аалыҵ бзиала еиқәдыршәар алшоит. Аԥхьаҟагь ацхыраара раҳҭароуп, еиԥҟьарада аус руларцаз иаахәахоит агенератор", - иҳәеит иара.
Џьопуа иара убасгьы дырҭааит Ԥшьаԥи Кациқыҭи аҵыҵындрааӡарҭақәа ҩба. Арҭ апроектқәа ирзоужьын 2 млн мааҭ. Џьопуа иажәақәа рыла, анаплакқәа гәҭакыс ирымоуп 15-20 тонна рҟынӡа аҵыҵындра аҽаҩра аиура, урыстәылатәи аџьармыкьаҿ аиԥш аҭыԥантәи аџьармыкьаҿгьы аҭира.
"Ираҳҭаз ацхыраара қәҿиарала ахархәара арҭеит. Анхамҩақәа даара анапы рыдкылоуп. Анаплакқәа ирыгәҭакуп 15-20 тонна аҵыҵындра аҽаҩра аиура, уи урыстәылатәи аџьармыкьаҿ аиԥш аҭыԥантәи аџьармыкьаҿгьы аҭира алнаршоит. Ииашоу амҩа ҳануп. Ауаа аԥара рыҭара акәымкәа ирҭахны иҟоу амыруга раҳҭоит. Уи алҵшәа аанарԥшуеит", - ҳәа иҳәеит аминистр.
Кәтол ақыҭаҿ Беслан Џьопуа ачаи ааӡараз апроект шымҩаԥысуа гәеиҭеит. Аратәи ачаирҭақәа 60 шықәса иреиҳаны ирхыҵуеит. Асовет аамҭазы еиҭаҳан. Аиҳабыра рыцхыраарала анаплакыҩцәа 2 млн мааҭ иаԥсоу ачаи арҩаразы ахархәага аархәеит. Аминистр иҳәеит ԥхьаҟагьы анаплакқәа аҳәынҭқарраҟынтәи адгылара шроуло.