ГӘДОУҬА, рашәара 19 - Sputnik, Бадри Есиава. Гәдоуҭа араион ахадарахь 32 рзаҳал нашьҭуп, рашәара 15 рзы илеиз ақәаршҩы иахҟьаны зыҩнкәа аӡы ҩналаз рҟынтәи. Абри атәы Sputnik иазеиҭеиҳәеит араион ахадара ақалақь анхамҩа аусбарҭа аиҳабы Витали Агрба.
"Арзаҳалқәа зегь ҳадаҳкылеит, иҟалаз аԥхасҭа ахәшьара азҭо акомиссиа ҷыда аԥҵоуп. Урҭ русура алҵшәақәа рыла еизгоу ашәҟәқәа зегьы дәықәҵахоит аҳәынҭқарратә комиссиахь аԥсабаратә рыцҳара ахҟьаԥҟьақәа раԥырҟәҟәаразы", - ҳәа иҳәеит иара.
Гәдоуҭа ахада актәи ихаҭыԥуаҩ Валери Аҩӡба ишазгәеиҭаз ала, заа идрыцқьахьаз аӡы алаларҭақәа ирыбзоураны аԥхасҭа зоуз маҷуп.
Убри аан иара иазгәеиҭеит, аӡыршьҭрақәа шҭәу анхацәа уахь иҭарыжьуа аабзазаратә ҟьамсарла. Уи анаҩсгьы, ақалақь ауааԥсыра ахыбрақәа андыргыло џьара-џьара аӡцарҭақәа шадыркуа, уи ишахҟьо амҩадуқәа ирныло аӡы.
Ари азҵаара ӡбышьак аҭатәуп, иааизганы иалацәажәатәуп. Даҽазны ақәа анлеи иахылҿиаауа шәарҭахар ҟалоит", - ҳәа иҳәеит Аҩӡба.
Гәдоуҭа араион илеиз ақәаршҩы иахҟьаны аӡқәа хыҵны ауаа рыҩнқәа иҩналеит.
Гәдоуҭа араион ақыҭақәа рҿы амшцәгьа ԥхасҭа дук ҟанамҵаӡеит. Џьара-џьара адгьылқәа аӡәӡәеит, Хыԥсҭа ақыҭан ҩнык адыд-мацәыс асын, абзазаратә техника бжьысит, афымцацәаҳәақәа ҿыблааит. Афымца станиа маҷқәа аӡы рыҵалеит.