АҞӘА, ԥхынгәы 1 - Sputnik. Аԥсни Арцахи рыбжьара ашьапылампылтә еиндаҭлара ииагоуп, ахәмарра арыцхә макьана еилкааӡам ҳәа аанацҳауеит Аԥсны ашьапылампыл Афедерациа.
2024 шықәса рзы ConIFA ала Ашьапылампыл азы адунеи ачемпионат иалахәхо акоманда аилкаараз ахәмарра мҩаԥысран иҟан ԥхынгәы 10 рзы.
Ахәмарра ахыгоуп Ҟарабах аҭагылазаашьа ахьҭышәынтәалам иахҟьаны, Арцах иарбаз амш азы ашьапылампыл асра изалахәхом.
"Даара ҳгәы иалоуп ари аҩыза аҭагылазаашьа ахьышьақәгылаз. Аԥсны ашьапылампыл Афедерациеи ҳареи ҳаимадоуп ахәмарра аналаршахо арыцхә алхразы. Ассоциациа европатәи аҟәшақәа зегьы ԥхынҷкәын 31-нӡа алхратә хәмаррақәа мҩаԥыргароуп", - ҳәа иҳәеит Ассоциациа европатәи аҟәша аиҳабы Альберто Рискио.
Ашьапылампыл азы адунеи ачемпионат ConIFA 2024 мҩаԥгахоит иааиуа ашықәс азы Курдисҭан (Иран). Зынӡа ачемпионат иалахәхоит 16 команда.