АҞӘА, ԥхынгәы 14 - Sputnik. 2023 шықәса ажьырныҳәа 1 инаркны ԥхынгәы 1 аҟынӡа Аҳәынҭқарратә миграциатә маҵзура авизақәа роуразы иаднакылеит 4061 рзаҳал ҳәа Аҳәынҭқарратә миграциатә маҵзура аиҳабы Рамин Габлаиа аԥыза-министр Александр Анқәаб изеиҭеиҳәеит. Абри атәы аанацҳауеит Аминистрцәа реилазаара апресс-маҵзура.
Амиграциатә шәҟәҭаҩра рызуын 2430-ҩык атәымтәылауаа. Уи адагьы Аҳәынҭқарратә миграциатә маҵзура иаднакылеит 3717 рзаҳал аусурҭа аиуразы, 400 рзаҳал аусураҭаҩцәа рҟынтәи иаднакылеит. Иахьазы Аԥсны аус руеит адунеи атәылақәа 28 ртәылауаа.
Аихшьаалақәа рыла, 2023 шықәса аԥхьатәи азбжазы ареспубликатә биуџьет иҭалеит авизақәа рыхә аҳасабала 17,5 миллион мааҭ, аусуралшара аҭаразы - 15,8 миллион мааҭ, апатент аҭаразы - 4,4 миллион мааҭ. 6,8 миллион мааҭ аҳәаанырцә усутә мчы ахархәаразы ирызшәан аусураҭаҩцәа.
Уи адагьы, шықәсыбжак иалагӡаны Аҳәынҭқарратә миграциатә маҵзура аӡбарҭахь инанашьҭит 55 материал.