АҞӘА, ԥхынгәы 18 – Sputnik. Аԥсны ахада Аслан Бжьаниа Очамчыра араион амҩаду хада лашарала аиқәыршәашьа шцо гәеиҭеит.
Аусурақәа шцо, иҟаҵатәны иҟоу атәы ахада изеиҭеиҳәеит Акапиталтә ргылара аусбарҭа аиҳабы Ҭемыр Агрба.
"Ареспубликатә мҩаду ахәҭа Ԥсоу-Очамчыра лашарала аиқәыршәара ҳаҿуп. Иҵарсуп 300 шьаҟа. Аԥхьатәи аетап аан иргылан 600 шьаҟа – Аӡҩыбжьа инаркны Лабранӡа. Уажәы Гәылрыԥшь агәы инаркны Аӡҩыбжьатәи амилициа рпост аҟынӡа идыргылахьеит, афымцацәаҳәақәа хыршьуеит. Анаҩс Лабра инаркны Очамчыра аганахь идәықәлоит", – иҳәеит иара.
Агрба иҳәеит иҟаҵаз аекономиа ахархәарала даҽа 109 шьаҟа шаахәаз, ахарџьынҵа аҳәаа иҭымҵӡакәа алашара Очамчыра аихамҩатә еихысырҭаҟынӡа инаргар шрылшо.
Акапиталтә ргылара аусбарҭа аиҳабы ишиҳәаз ала, аусурақәа цәыббра 30 ирхыгахом.
Аԥсны Мраҭашәаратәи ахәҭаҿгьы аусурақәа цоит. Уа алашарбагақәа шамахамзар икнаҳауп, аха иҟоуп даҽа проблемак – амашьынарныҟәцаҩцәа 12 рҟынӡа шьаҟа карыжьхьеит. "Амшынеиқәафымцамч" аҿы ирымоу ашьаҟақәа рыла ирыԥсахуеит, аха ас ицар, аамҭақәак рышьҭахь аҿыцқәа аахәатәхоит.