АҞӘА, ԥхынгәы 22 - Sputnik. Очамчыра араион абиуџьет аҟынтәи 250 нызқь мааҭ азоужьуп аџьықәреирҭақәа аԥхасҭа рызҭо ахәаҷақәа- абӷьытә тыӷәазал рнырҵәаразы, абри атәы Очамчыра информ иазеиҭеиҳәеит араион анапхгара ақыҭанхамҩа аҟәша аиҳабы Ҭенгьиз Какәбаа.
Какәбаа иажәақәа рыла, ахәаҷақәа рбеит ақыҭақәа Маркәылеи Акәасқьеи рҟны.
Иахьазы аус рыдулоуп 130 гектар. Зынӡа ицәаӷәаны аџьықәреи лаҵоуп 1900 гектар. Ахәшәқәа ақыҭанхамҩа аминистрра аҟынтәи ирыҭоуп.
Гәылрыԥшь араион анапхгара ақыҭанхамҩа аҟәша аиҳабы Рафик Григориан ишыҩҳәаз ала, араион аҟны 800 гектар амхқәа цәаӷәоуп. Урҭ рҟынтәи 600 гектар -аџьықәреи, 150 гектар-ауҭраҭых, 20 гектар-акартош, 20 гектар- амҟәыбырҭра, даҽа 10 гектар- аҟәыд, аҟаб, ацыца.
Гәдоуҭа араион аҟны сынтәа еиҳа имаҷны аџьықәреи ларҵеит, ҵыԥхтәи арбагақәа аасҭа.
Гәдоуҭа араион анапхгара ақыҭанхамҩа аҟәша аиҳабы Иури Кәарцхьиа иажәақәа рыла, араион аҟны ицәаӷәоуп 1200 гектар адгьыл.