АҞӘА, жьҭаара 11 – Sputnik. Апрокуратура хада ашьаус хацнаркит аҵиаақәа ркарантин азы Аҳәынҭинспекциа ахада Аркади Џьынџьиеи аҳасабеилыргаҩ хада Кан Кәарҷиеи рганахьала ҳәа аанацҳауеит апрокуратура асаит.
Дара рганахьала агәызҩара ыҟоуп х-епизодк рганахьала: амаҵзуратә лшарақәа рхархәара, Аҳәынҭинспекциа амазара аимҵәара, амаҵзуратә ҭагылазаашьа ахархәарала анаплакҩы Гьаргь Аԥҳазаа далархәны хыԥхьаӡара рацәала аӷьычра.
Аусҭҵаара адыррала Кәарҷиеи, Џьынџьиеи, Аԥҳазааи аилаӡара рыбжьарҵеит 6,5 миллион мааҭ иаԥсоу ахархәагақәа раахәаразы. Убри аан дара ирдыруан ахархәагақәа раахәара шхымԥадатәимыз, иаархәоз аџьармыкьатә хәыԥсагьы ҩынтә еиҳаны ишарбаз.
Аԥарақәа Аԥҳазаа иԥхьаӡамҭахь иҭалеит, анаҩс иара иҭыганы 5,9 миллион мааҭ Кәарҷиеи Џьынџьиеи ириҭеит.
Иара убасгьы Аркади Џьынџьиеи Кан Кәарҷиеи абиуџьеттәии абиуџьетнҭыҵтәии ԥарақәа рӷьычра хықәкыс иҟаҵаны 2019 шықәса ажьырныҳәа 1 инаркны 2022 шықәса ԥхынҷкәын 31 рҟынӡа еиуеиԥшымыз аамҭақәа рзы Аҳәынҭинспекциа абаланс аҿы иҟамыз амашьынақәа рремонти ахархәагақәа раахәареи рзы илырҩааит 575 000 мааҭ.
Уи адагьы, Аркади Џьынџьиа имаҵзуратә зинмчра ихы иархәаны аусбарҭа аусзуҩцәа равтомашьынақәа арендала игазшәа аилаӡара ҟаиҵеит, урҭ аусзуҩцәа аусутә напынҵақәа рзы акы алагаҩагара шыруалмызгьы. Арҭ амашьынақәа рремонти рхархәагақәеи рзы илиҩааит 512 000 мааҭ.
Апрокуратура адырра ҟанаҵоит 2021 шықәса ԥхынгәы 1 инаркны 2022 шықәса нанҳәа 1 аҟынӡа Аркади Џьынџьиа иԥаршеиз аилаӡарақәа ҟаиҵеит Аҳәынҭинспекциа аусзуҩцәа амаҵзурақәа рзынаигӡозшәа. Кан Кәарҷиеи иареи есымза ашәарацҵақәа рзахиԥхьаӡалон. Абри ала Аҳәынҭинспекциа 1,19 миллион мааҭ аԥхасҭа аиҭеит.
Иазгәаҭоуп агәаҭараан агәызҩара ззыҟоу ахаҿқәа Аҳәынҭинспекциа иарҭаз ахарџь, 6 500 000 мааҭ шдыртәаз.