АҞӘА, абҵара 21 - Sputnik, Бадраҟ Аҩӡба. Адокументалтә фильм "Майдан. Поворот на войну" дырбан Владислав Арӡынба ихьӡ зху Аибашьратә фырхаҵара амузеи аҟны аҩаша, абҵара 21 рзы.
"Жәашықәса раԥхьа иалагеит ахҭыс рацәа еидызҳәалаз, иахьа ҳзлынхо аҭагылазаашьагь налаҵаны "Майдан Незалежности" захьӡу. Анеонацистцәа амчраҿ рааира ишьаарҵәырахеит", - ҳәа иҳәеит Аԥсны иҟоу Урыстәыла ацҳаражәҳәаҩ Михаил Шургалин.
Иара иазгәеиҭеит, урыстәылатәи ар иарӷьажәҩаны ишрывагылоу аԥсуа фырхацәа.
"Аиааира 30 шықәса ахыҵраан ҳара иаҳгәалаҳаршәон, аибашьраани уи ашьҭахьтәи ашықәсқәеи рзы аԥсуаа рыцхрааразы урыстәылаа шаауаз. Уажәы аԥсуаа ҳара ҳацхрааразы ицоит, ари иаанаго аиашьаратә еизыҟазаашьа, аҩызаратәи астратегиатә еизыҟазаашьеи ауп", - иҳәеит адипломат.
Адокументалтә фильм арбара иалахәын атәыла ахада ихаҭыԥуаҩ Бадра Гәынба, аԥыза-министр Александр Анқәаб.
Адокументалтә фильм "Майдан. Поворот на войну" аҭыхрақәа мҩаԥысуан 2014 шықәса инаркны 2022 шықәсанӡа. Аҭыхратә гәыԥ RT Documentary аашықәса ахҭысқәа рыҿиашьа еидыркылеит.
Жәашықәса раԥхьа абҵара 21 рзы иалагеит "евромайдан". Ари аҽны 1913 шықәсазы Евроидгыла ассоциациа азы аиқәшаҳаҭра анапаҵаҩра аанкылараз атәыла аиҳабыра ирыдыркылаз аӡбамҭа иахҟьаны Киев аҿагыларақәа ирылагеит.