АҞӘА, жәабран 3 – Sputnik. Амилаҭтә сахьаҭыхымҭақәа ргалереиа аҩбатәи аихагыла ҳазҭоу ашықәсазы еиҭашьақәыргылахоит ҳәа адырра ҟанаҵоит акультура Аминистрра апресс-маҵзура.
Аԥсны аԥыза-министр Алеқсандр Анқәаб идҵала аҟазауаа ахыбра аҭагылазаашьа ҭырҵааит.
"Абылра иацәынхази аԥхьаҟа иаархәараны иҟоу асахьаҭыхымҭақәеи, иара убас аусуцәа ахьтәаша ауадақәеи абарҭ роуп раԥхьа иҟаҵатәу. Уи азы уажәы ҳахәаԥшны ҩба-хԥа уада алхны еиҭашьақәҳаргылоит", - ҳәа иҳәеит Аҳәынҭқарратә еилазаара "Аԥсныргылара" адиректор хада Руслан Тәанба.
Уажәазын иазгәаҭоу ҩба-хԥа уада реиҭашьақәаргылараз апроект-харџьынҵатә шәҟәқәа реиқәыршәара иаҿуп, аекспертиза мҩаԥгахоит.
Амилаҭтә сахьаҭыхымҭақәа ргалереиа ахыбраҟны имҩаԥысыз анҭыҵтәи аилатәара рхы аладырхәит атәыла акультура аминистр аамҭала инапынҵақәа назыгӡо Динара Смырԥҳа, аҭоурых-культуратә ҭынха ахьчаразы Аҳәынҭқарратә усбарҭа анапхгаҩы Гарик Сангәлиа, Аҳәынҭқарратә еилазаара "Аԥсныргылара" адиректор хада Руслан Тәанба, Амилаҭтә сахьаҭыхымҭақәа ргалереиа адиректор Сурам Сақаниа, Аԥсны шьаҭанкылатәи аргыларатә усбарҭа ахаҭарнакцәа.
Ажьырныҳәа 21 рзы Аԥсны асахьаҭыхыҩцәа реидгыла ахыбра амцакраан иблит Амилаҭтә сахьаҭыхымҭақәа ргалереиа афонд. 4000 сахьаҭыхымҭақәа рҟынтәи иаанхеит 200.