АҞӘА, мшаԥы 6 – Sputnik. Афымцалашара арцәара аамҭеихша ҿыц алагалахоит мшаԥы 7 инаркны ҳәа аанацҳауеит "Амшынеиқәафымцамч".
Афымца дырцәалоит уахыки-ҽнакиы ф-сааҭк.
ЕгрыГЕС адеривациатә туннель 8-тәи км аҟны аҭӡы ԥхасҭахеит, атурбинатә хәҭа абетонтә пҽыхақәа ҭаҳаит, уи иахҟьаны астанциа амҭала аусура аанкылоуп.
Аиҭашьақәыргыларатә усурақәа мҩаԥыслоит мшаԥымза 15 нӡа. Аусурақәа анхыркәшахалак Џьуартәи аӡеизакырҭаҿ аӡы аҩаӡара шьҭыҵыр иалагалоу аԥкрақәа зынӡа иаԥыххоит.