АҞӘА, жәабран 15 - Sputnik. 2691-ҩык ауаа рыбжьы арҭеит Москва Аԥсны ахада иалхрақәа рзы абжьыҭираан, абиуллетенқәа рыԥхьаӡара иалагеит.
"Москва ҳалхрақәа рҭоурых аҿы ариаҟара абжьыҭира иааиуа иҟамлацызт", — иҳәеит алхратә ҭыԥ ахантәаҩы Беслан Кобахьиа.
Асааҭ 19:30 рызтәи адыррақәа рыла, рыбжьы арҭеит 65% алхыҩцәа, хыԥхьаӡарала 95000-ҩык ауаа. Алхырҭатә ҭыԥқәа зегь адыркит асааҭ 20.00 рзы.
Аилагарақәа ҟалеит ҳәа аӡәгьы дмашшӡеит ҳәа азгәарҭеит апрокуратуреи аҩнуҵҟатәи аусқәа рминистрреи. Аинтернет дкыларҭагьы аусура уажәраанӡагьы иаҿуп.
Атәылаҿы алхырҭатә ҭыԥқәа 152 аартуп, Урыстәыла -- даҽа ҩба. Москва алхыҩцәа агәаран иқәгылан. Ауаа ҭаацәала иааиуан, Урыстәыла егьырҭ арегионқәа рҟынтәигьы иаауан.
Атәыла алхырҭатә ҭыԥқәа зегьы рышәқәа аадыртит асааҭ 08:00 рзы. Абжьыҭаразы асиа иануп 134 500-ҩык алхыҩцәа. Аԥсны алхратә комиссиа хада ауаа рааишьазы асааҭ 18:00 рызтәи адыррақәа рыла, рыбжьы рҭихьан 55% алхыҩцәа - 79 нызқьҩык инареиҳаны. Убас ауаа рааишьала алхрақәа шьақәгылеит ҳәа азырԥхьаӡеит. Алхрақәа ирхылаԥшуан 100-ҩык инареиҳаны жәларбжьаратәи анаԥшцәа.
Заатәи адыррақәа АКХ аҿы ирҳәоит жәабран 16 рзы.
Аԥсны ахадарахьы иқәгылоуп хәҩык акандидатцәа – Бадра Гәынба, Адгәыр Арӡынба, Роберт Аршба, Олег Барцыц, Адгәыр Хәырхәмал. Аиааира игеит ҳәа дрыԥхьаӡоит алхыҩцәа рзеиԥш хыԥхьаӡара аҟнытә 50 проценти даҽа бжьыки зауз акандидат.
Абиуллетен ҩыџьа инареиҳаны акандидатцәа алагалазар, урҭ рахьтә аӡәгьы далхымзар, АКХ аиҭалхрақәа рзы абжьыҭара амҩаԥгара азгәанаҭоит реиҳа абжьқәа зауз ҩыџьа акандидатцәа рыбжьара. Аҩбатәи атур ҟалоит ҩымчыбжьа ирхымгакәа.