АҞӘА, ԥхынгәы 20 – Sputnik. Максим акыр дуаҩымын, шамахамзар аӡәгьы диҿцаауамызт ҳәа Sputnik иазеиеҭеиҳәеит зыхьӡ ӡырызгар зҭахымхаз Афон ҿыцтәи ауаҩԥсы.
"Иара шамахамзар асасааирҭа ддәылҵуамызт. Аиҳарак амшын ахь дныҟәон. Иԥсы ишьон", — иҳәеит иара.
Максим уахьихәаԥшуаз аԥара рацәа змоу диеԥшымызт, егьырҭ дызларылукаауаз акгьы далаҟамызт.
"Зегь реиԥш деибыҭан. Ԥсшьаҩык иаабац дшыҟоу дыҟан. Иҟалап аҽалкаара иҭахымзаргьы", — иҳәоит ҳзыҿцәажәоз ауаҩы.
Максим Иаковлев даныӡыз амш аҽны ауаа дырбон адәқьан аҿы. Мызкы аҩныҵҟала иара имаршрут шамахамзар имԥсахцызт.
"Мчыбжьык ахь ҩынтә-хынтә дызбон аха аҭыԥантәиқәа дрылаҳәуамызт. Еснагь ихала дыҟан", — ҳәа еиҭалҳәоит ақалақь аҿы инхо аҽа ԥҳәыск.
Интерпол зышьҭаз урыстәылатәи абизнесуаҩ Максим Иаковлев дырӷьычит Аԥсны 2018 шықәса рашәара 20 рзы.
2018 шықәса рашәара 20 асааҭ 02:30 рзы Афон Ҿыц, Максим Иаковлев дзыҩназ ауадахь инеит зхаҭара шьақәыргылам асабардақәа зҿаз хҩык ауаа. Дара абџьарла еибыҭан.
Убри аамҭазы асасааирҭаҿы иҟаз ахьчаҩцәеи администратори роуп. Абџьар ахархәарала арҭ ауаа ршәаны ахьчаҩцәа руада иҩнаркит. Нас аномер 204 ахь ихалеит. Усҟан абри аномер аҿы дынхон Урыстәыла атәылауаҩ Иаковлев Максим Николаи-иԥа.
Ацәгьоуцәа ашә ҿжәаны Иаковлев ддәылганы дыргеит.
Ахҭыс инадҳәаланы аусҭҵаара нап аркын. Рҿахәы рҿыхын асасааирҭа аусзуҩцәа.
Уаанӡа, аинформациатә ресурс "Фонтанка" адырра ҟанаҵахьан Санкт- Петербург Максим Иаковлев иӷьычра инадҳәаланы ашьаус хацыркуп ҳәа.
Иӡыз иԥҳәыс азинмчратә усбарҭақәа адырра рылҭеит лхаҵа Аԥсныҟа дахьцаз дшыӡыз азы.
Максим Иаковлев рашәара 20 рзы дыӡит. Аамҭақәак рышьҭахь иԥҳәыс илоуит ашәҟәы, 200 миллион мааҭ аԥара еизылгарцгьы адҵа анҵаны. Ашәҟәаҿы аԥҳәыс илыдгалан аԥарақәеи лхаҵа иԥсҭазаареи реиҭныԥсахлара.
Максим Иаковлев акционертә еилазаара "Полиграфоформление" адиректор хадас дыҟан, иара убасгьы Кировтәи азауад акционерцәа реилазаара адиректорс дыҟан.
Sputnik Кыргызстан адыррақәа рыла Максима Иаковлев ахара идырҵоит еиуеиԥшым ацәгьоурақәа рзы. Уаанӡа иара Бишкек ақалақь аӡбарҭа латәарада ашьаус иқәнаҵахьан.