АҞӘА, ажьырныҳәа 30 – Sputnik, Бадри Есиава. Аԥсны Алхратә комиссиа хада Иреиҳаӡоу аӡбарҭа ахашшааратә инстанциа атәыла ахада иалхрақәа рзы аӡбамҭа иазашшыр ҟалоит ҳәа Sputnik иазеиҭеиҳәеит Аԥсны АКХ ахантәаҩы Ҭамаз Гогьиа.
"Ҳара абри азҵаара ҳалацәажәароуп. Азингьы ҳамоуп, аамҭагьы ҳамоуп. Аҟазауаа адокумент ҭырҵаароуп. Ҳара агха ҳхахьы иаагар ҳҭахым, избанзар азакәан аҳәаақәа ҳарҭымҵит. Ҳара иара азакәан ахаҭаҿы аиқәымшәарақәа шыҟоу аадыруеит", - иҳәеит Гогьиа, иагьациҵеит АКХ азин ахы ианархәар ҟалоит ҳәа.
Иара убасгьы далацәажәеит атәыла ахада иеиҭалхрақәа рыҽшазыҟарҵо.
Цәыббра 8, 2019 шықәса рзы имҩаԥгахеит Аԥсны ахада иалхрақәа. Атәыла ахадас ркандидатура ықәдыргылеит: Рауль Ҳаџьымба, Алхас Кәыҵниа, Олег Аршба, Асҭамыр Ҭарба, Леонид Ӡаԥшьба, Шамиль Аӡынба, Алмас Џьапуа, Артур Анқәаб, Асҭамыр Какалиа.
Аҩбатәи атур аҟны еиндаҭлон Рауль Ҳаџьымбеи Алхас Кәыҵниеи. Аҩбатәи атур аан аԥыжәара игеит Рауль Ҳаџьымба, 47,39% бжьы иманы, аха ажьырныҳәа 10, 2020 шықәса рзы Иреиҳаӡоу аӡбарҭа ахашшааратә коллегиа урҭ алхрақәа реихшьаала иашамызт ҳәа аӡбамҭа аднакылеит. Убри ашьҭахь Алхратә комиссиа хада алхра ҿыцқәа ррыцхә шьақәнаргылеит - хәажәкыра 22, 2020 шықәса.
Иара убас шәаԥхьар ҟалоит:
Кәарҷиа еиҭеиҳәеит "Аԥсны ахада иалхразы" азакәан адепутатцәа иахьазы ишазыҟоу
Иреиҳаӡоу аӡбарҭа Аԥсны ахада иалхрақәа рылҵшәақәа закәаным ҳәа иазханаҵеит