АҞӘА, жьҭаара 28 - Sputnik. Аԥсны атәылауаа ркатегориақәак рзы COVID-19 аҟынтә хымԥадатәи алаҵаҟаҵара алагалара азҵаара иахәаԥшраны иҟоуп Акоординациатә штаб аилатәараҿы.
Акоординациатә штаб аилатәараҿы ари азҵаара алацәажәаразы ажәадгала ҟаиҵеит Аԥсны аԥыза-министр Александр Анқәаб, асанитар ҳақьым хада Лудмила Скорик далархәны жьҭаара 27 рзы имҩаԥигаз аилацәажәара аихшьаалақәа рышьҭахь.
Хымԥадатәи алаҵаҟаҵара иаҵанакыр алшоит ауааԥсыра ирныруа абиуџьет усхкқәа русзуҩцәа. Иара алагалахар ҟалоит аковидҿагыларатә уснагӡатәқәа рырӷәӷәара инацҵаны акоронавирустә ҭагылазаашьа ахьыуадаҩу азы.
Иара убас аилацәажәараҿы иҳәан 30 000 доза алаҵа "Спутник V" Аԥсныҟа иааргараны иҟоуп ҳәа.