АҞӘА, абҵара 22 - Sputnik. Аԥсны Аҩнуҵҟатәи аусқәа рминистрра ҩымш раԥхьа ироуит Гагреи Гәдоуҭеи амаининг-фермақәа ыҟоуп ҳәа иахьыԥхьаӡоу аҭыԥқәа рсиа, абри атәы иҳәеит Аԥсны Аҩнуҵҟатәи аусқәа рминистр Дмитри Дбар Аҳәынҭқарра ахада имҩаԥигаз аилатәараҟны, ҳәа аанацҳауеит Аԥсныпресс.
"Аԥсны ААР агәыԥ еиҿкаауп. Ҳусура алҵшәа аиурц азын ҳара иаҳҭахуп Аҳәынҭстандарти "Амшынеиқәафымцамчи" ргәыԥқәа", - иҳәеит Дмитри Дбар.
Аслан Бжьаниа агәынамӡара ааирԥшит, асиақәа шроузашәа аусура иахьаламгаз азы.
Аҳәынҭқарра ахада аԥыза-министр ихаҭыԥуаҩ, аекономика аминистр Кристина Озган лнапы ианиҵеит системала аусура мҩаԥгалазарц, есыҽны закәаншьаҭадатәи аҿакрақәа ҭырҵааларц, русура аихшьаалақәа есымчыбжьа иаздырхиаларц.
"Акриптовалиута арҳареи афымцатә ҳақәа закәаншьаҭада аҿакреи рус аҟны асистематә усура еиҿкаамхеит. Аусура аамҭалатәхеит", - иҳәеит Бжьаниа.
Аслан Бжьаниа абҵара 22 рзы аиҳабыра алахәылацәа, ахада Иусбарҭа усзуҩцәа, аҳәынҭусбарҭақәа рнапхгаҩцәа алархәны инарҭбаау аилацәажәара мҩаԥигеит. Аизараҿы излацәажәоз тема хадан, атәыла фымцалашарала аиқәыршәареи, уи азы аԥареизгара аиҿкаареи.