АҞӘА, жәабран 23 – Sputnik. Џьуартәи аӡеизакырҭаҿы аӡы алаҟәреи Урыстәылантәи иаауа афымцамчхара амаҷреи ирыхҟьаны афымца анашьҭразы аԥкра ҿыцқәа алагалахоит, абри атәы аанацҳауеит "Амшынеиқәафымцамч".
Аԥкрақәа ирыҵаркуам аӡылбааҽҽатә ГЕС-1 аҟынтәи алашара зауа Аԥсны Мрагыларатәи ахәҭа.
"Амшынеиқәафымцамч" аҿы иазгәарҭеит аԥкрақәа аанхоит ГЕС аусуразы аӡы аҩаӡара иахәҭоу арбагаҿынӡа ихалаанӡа ҳәа.
2022 шықәсазы Урыстәылантәи иҳарҭо афымцамч ахышәаҵышәа 300 миллион кВт-с ахархәара аҭоуп, ашықәс зегьы иазоужьуп 660 миллион кВт-с. Абри аҩыза арбагақәа ааигеит АУН адиспетчертә маҵзура аиҳабы Гурам Џьаџьаиа жәабран 10 азы имҩаԥгаз апресс-конференциаҿ.
Абри инадҳәаланы иалагалатәхоит аԥкрақәа ҳәа иҳәеит аилахәыра ахаҭарнак.
Аамҭа-аамҭала алашара арцәара алагалоуп жәабран 7 аахыс Аԥсны иахьаҵанакуа. Аԥсны афымцамчтә усхк ауадаҩра хадақәа иреиуоуп иақәу аидара ахьдууи аинфраструктура ахьажәуи. Афымцамч ахьазымхо, афымцаҳақәа ахьажәу азы атәылаҿы акриптоԥара арҳаразы амаругақәа русура азин ыҟам.
Аԥсны Урыстәылантәи афымцамч аиуеит 2021 шықәса ԥхынҷкәынмза инаркны, уи абзоурала ҳтәыла хы-хәҭак рҟынтәи ҩба лашарала еиқәыршәоуп, егьи ахәҭа - аӡхыҽҽатә станциа "ГЕС-1" аҟынтәи иаиуеит.
Џьуартәи аӡеизакырҭа алшарақәа нҵәеит, ЕгрыГЕС ԥсабаратәла иазнеиуа аӡала аус ауеит, уи атәыла мрагыларатәи ахәҭа лашарала аиқәыршәара иазхом, убри азы уаҟагьы аамҭа-аамҭала алашара дырцәоит.