2023 шықәса актәи амчыбжь азы ареспублика анхацәеи асасцәеи аныҳәатә усмҩаԥгатәқәеи анашанатә лакәқәеи рзыԥшуп.
Сариа Кәарцхьиаԥҳа, Sputnik
Ҳазҭалаз амчыбжь азы Аԥсны ашықәсҿыцазтәи аусмҩаԥгатәқәа ирыцырҵоит.
Аԥсуа драматә театр аҿы ажьырныҳәа 2-4 асааҭ 12:00, 14:00 рзы иддырбоит ашықәсҿыцазтәи аспектакль "Анашанатә чықьмаџьа", арежиссиор - Алхас Шамба.
Искандер ихьӡ зху Аурыс драматә театр аҿы ажьырныҳәа 2-5 асааҭ 12:00, 15:00 рзы иддырбоит амузыкатә лакә "Алые паруса", ақәыргылаҩ - Аԥсны зҽаԥсазтәыз артист Џьамбул Жорданиа.
Ажьырныҳәа 6 асааҭ 19:00 рзы ахәаԥшцәа иддырбоит аспектакль “Мама”. Арежиссиор-ақәыргылаҩ - ГИТИС арежиссиортә факультет 5 акурс астудент Евгени Закиров. Аҭаацәа ирызку аспектакль алхуп Флориан Зеллер ипиеса. Уи аҟны ишьҭыхуп абзиабара, азаҵәра, хырԥашьа змам ажәра ртемақәа.
Ажьырныҳәа 7 асааҭ 19:00 рзы - “Зегь рцасҳәа агәырӷьара” (“Радость вопреки всему”), урыстәылатәи арежиссиор Мариа Романова лықәыргыламҭа. Аспектакль аԥсҭазаара агәазыҳәара иазышәаҳәоит, испаниатәи ашәҟәыҩҩы, адраматург Федерико Гарсиа Лорка ипоезиа ссир иахылҿиааит.
Ажьырныҳәа 8 асааҭ 19:00 рзы - акомедиа “Примадонны”. Уи аҟны иаарԥшуп рбаҩхатәра рхы иархәаны атәым мазара зтәызтәырц зҭаху ҩыџьа аусурҭа змам актиорцәа рҭоурых.
Аԥсуа ҳәынҭқарратә Аҿар ртеатр аҿы ажьырныҳәа 5 асааҭ 18:30 рзы иҟалоит аспектакль "Аԥсҭазаара ахаҿсахьа". Атеатр актиорцәа аԥсуа шәҟәыҩҩцәа Шоҭа Ҷкадуа, Шьалодиа Аџьынџьал, Таиф Аџьба рсатиратә рҿиамҭақәа ирылхны аскетчқәа ҳдырбоит.
Аҟәа анхацәеи асасцәеи рзы аныҳәатә усмҩаԥгатәқәа ирыцырҵоит.
Убас, ажьырныҳәа 6 рҟынӡа аԥсаӡ ахьгылоу Ахақәиҭра ашҭаҿы ауаҩы иоура-зоуроу акьанџьақәа ркарнавал ҟалоит.
Ажьырныҳәа 10 рҟынӡа Ахақәиҭра ашҭаҿы асааҭ 19:00 рзы иддырбалоит ашықәсҿыцазтәи афильмқәеи амультфильмқәеи.
Ажьырныҳәа 6 асааҭ 15:00 рзы Ахақәиҭра ашҭаҿы ашколхәыҷқәа амузыкатә театртә қәыргыламҭа ддырбоит.
Ажьырныҳәа 7 асааҭ 16:00 рзы иҟалоит ахәыҷтәы студиақәа еиҿыркааз Қьырсаныҳәа иазку аконцерт.