АҞӘА, цәыббра 15 - Sputnik. Донецктәи Жәлар рреспублика Иреиҳаӡоу аӡбарҭа аполк "Азов" арныҟәараз аинструктор Руслан Колодиажни 26 шықәса иқәнаҵеит ҩыџьа ауаа рышьразы, абри атәы аанацҳауеит Урыстәыла ашьаусҭҵааратә еилакы.
Колодиажныи аграждантә уааԥсыра мҽыӷрыла дрызныҟәон, иара аполитикатәии аидеологиатәии цәымӷра амотивқәа ирхырҟьаны ауаа ишьит.
Ашьаусҭҵаара ишьақәнаргылеит хәажәкыра 15 инаркны мшаԥы 12 рҟынӡа 2022 шықәсазы ахара здырҵаз иҩызцәеи иареи Мариуполь аграждантә обиектқәеи ахатәы ҩынқәеи рҿы игылаз апозициақәа рҟны дыҟан ҳәа.
Ҽнак зны Колодиажнии аррамаҵзура ицахысуаз иҩыза Стронькои харамкәа имҩасуаз, иабџьардаз ҩыџьа ауаа ршьырц адҵа рырҭеит. Амҩасцәа урыстәылаа ирыдгылоит ҳәа ишьаны Калашников иавтомат ала ириехсны иршьит.
Стронько иганахь ала аӡбарҭа хазы аусҭҵаара мҩаԥнагоит.