АҞӘА, лаҵара 23 - Sputnik. Лаҵара 23 рзы Аԥсны аиашахаҵаратә уахәама иазгәанаҭоит Амшаԥныҳәа анаҩс ихадоу ҳәа ирԥхьаӡо Симон Канатәи игәаларшәара амш.
Аныҳәа аҳаҭыр азы, ҳтәыла ауахәамақәа рыҟны имҩаԥысуеит Анцәа имҵаныҳәара.
Абиблиаҿы иаҳԥыло аҳәамҭақәа изларҳәо ала, заԥхьаҟа ицҳаражәҳәаҩхараны иҟаз Симон Галилеиатәи Канаҿы имҩаԥысуаз ичараан Иаса Қьырса инаигӡеит раԥхьатәи анашана - аӡы ҩны иааҟаиҵеит. Абри ахҭыс Симон наҟ-наҟтәи иԥсҭазаара шьаҭанкыла иаԥсахит, иара Иаса Қьырса иџьашьахәра хаҵаны иҵаҩцәа 12 дыруаӡәкхеит. Иаса Қьырса ажәҩан ахь данхалаз ашьҭахь Аҩынҩажәижәабамш аҽны Сионтәи аҩнаҟны амца иабзқәаны аԥсҿыхҩы иҵаҩцәа ирзылбааз Иԥшьоу аԥсыцқьа иҟынтә Симон иоуит аҳамҭа. Егьырҭ ацҳаражәҳәаҩцәеи иареи Қьырса и-Евангелие абжьагажәахь еиццәырҵит.
Иҟоу адыррақәа рыла, I ашәышықәса азбжазы ацҳаражәҳәаҩцәа Андреи Аԥхьанаԥхьаҩи Симон Канатәи Аԥсныҟа иааит Иаса Қьырса дшыбзахаз ажәабжь рыманы.
Симон Канатәи Афон ҿыц аӡиас Ԥсырӡха ааигәара иҟоу аҳаԥы нхарҭас иалихит. Андреи Аԥхьанаԥхьаҩ иакәзар - Анцәа иажәа аларҵәаразы имҩа иациҵеит Амшын еиқәа аҿықә аҩадаҟа даваланы.
Абри аамҭоуп Аԥсны ақьырсианра алаҵәара ианалагаз ҳәа иԥхьаӡоу.
Ақьырсиан динхаҵаҩцәа анықәырцоз аамҭазы, Ацқьа Ацҳаражәҳәаҩ Симон Канатәи Ԥсырӡха аӡиа ахықәан цәгьаԥсышьа иҭан дыршьуеит. Симон дахьынхоз аҳаԥы ааигәара аӡыхь нашана ыҵыҵуа иалагеит. IV ашәышықәсазы Симон Канатәи анышә дахьамадоу ааигәара ихьӡала ауахәама ргылан.
2023 шықәса рашәарамзазы Симон Канатәи иԥсыбаҩ аҟәырҷаха Аҟәатәи Акафедралтә ныхабаа ҳамҭас иарҭеит палестинатәи Аимператор аиашахаҵаратә еилазаара аԥшьгарала.
Аԥсны Аиашахаҵаратә уахәама ахада Виссарион Аԥлиа усҟан иҳәеит, аҟәырҷаха аныхабаа аҭара - ҳтәылаҿ аиашахаҵара ныҟәызго зегь рзы ишгәырӷьара дуу.
"Ҳара ҳзымҵаныҳәо, ҳзымҵахырхәо Ацқьацәа рҟәырҷахак анҳауа, аиашахаҵара дин ныҟәызго зегь рзы ӷәырӷьара дууп. Ари аҭоурыхтә хҭысуп. Симон Канатәи иԥсыбаҩ Афонҽыц аҵәахырҭаҿ иҳамоуп, аха уи иҟәырҷаха ара Персиатәи аҳра аныҟаз Домаскҟа иган, уантәи Европаҟа", - ҳәа иҳәеит иара.
Иара убас, усҟан Акафедралтә ныхабаа ҳамҭас иаҭан Третиаков ихьӡ зху Ихьыԥшым аҭҵаарадырра-аҭҵааратә експертиза аиҳабы Александр Чвала иҟны иҵәахыз "Ацқьа ацҳаражәҳәаҩ Симон Канатәи" амедальон.
Италиа иҟаҵоу ахьӡы зхьыршоу араӡны медальон инықәырԥшны XVII ашәышықәса аҵыхәтәантәи аԥшьбараки - XVIII ашәышықәса алагамҭеи ирыҵанакуеит.