"Ушьапы ухьуа аныҟәара уеиԥхыӡыр": амҩа ажәаԥҟақәеи аԥхыӡқәеи рҿы

Амҩа – заҟа имариоузеи иагьыҵаулоузеи ари ажәа. Ақыҭақәа, ақалақьқәа, аҭыԥқәа уҳәа реидкыларадагьы, иара ауаҩы иԥсҭазаара ахаҭагьы мҩак иаҩызоуп уҳәар ауеит. Хымԥада, амҩақәа зегьы еиԥшым џьара имчымхарҭоуп, зназы ихылаӷьароуп, нас ишнеиуа иҟьаҟьароуп. Аԥсҭазааратә мҩаҿы уаԥхьаҟа ишьҭо аӡәгьы издырӡом.

Имҩану, акырӡа ирыхьӡарц зҭаху ауаа цәажәоит Иуа ибызшәала “Сымҩа маҷым, ихароуп, Сгәы иҭақәоугьы крырҭахқәоуп…”

Амҩа аԥсҭазаара, агәыхәтәы ахьӡара, ԥхьаҟа ацара иасимволуп. Жәлар рҟәыӷара згәылыжжуа аԥсуа жәаԥҟақәа рҿгьы амҩа атема бзианы иаарԥшуп. Иаагозар: "Амҩа бзиа аҭбаарала иудыруеит", "Амҩа здыруа ԥызаҩ диҭахӡам", "Амҩа иага ихаразаргьы, ииашоу уаныл", "Узышьцылам амҩа иаша аҵкыс, узышьцылоу амҩа хәахәа", "Амҩа уқәзар, умҩахь уԥшла", "Амҩа уанықәло уҽы бзиаз, аҩны уанааиуа – уԥҳәыс", " Амҩа хараҿ аҭәыцгьы еидароуп".

Мышныҟәа ахьуҭаху, хымш умҩаныфа шьҭых. Иҟалоит убас уусқәа зегьы уара ишуҭаху, уара ушрызхәыцуа ианыҟамло. Убри аҩыза аҭагылазаашьа уазхианы, агәҽанызаара уманы уҟазароуп.

Мышныҟәа иныҟәаз, шьыбжьаанӡаныҟәа игхеит. Ихықәкы, иус наигӡарц, далгарц маҷк зыгхаз изы абас рҳәоит.

Амҩақәа еизааигәахоит, еицәыхарахоит, џьара-џьара еилаҵәоит. Убас х-мҩак ахьеиқәшәо, даҽакала "х-мҩак ахьеихагалоу" ззырҳәо аҭыԥ аԥсуаа ҳҿы пату ақәуп. Агәаанагарақәа рыла уа узыҳәо ахьыҟало, иҟалараны иҟоу ахьеилкаахо, адырра ҿыцқәа ахьуоуа ҭыԥуп.

Аҭаацәара иаламлац аҿар ирынасыԥхо деилыркаарц (азгә. ԥхыӡла дырбарц) Хәажәкыра ауха абзиабара анцәахәы Нымираҳ изку ақьабз ҟарҵон. Анымираҳ изкны ақьабз шымҩаԥыргоз ҳәа ишәҟәы "Ажәақәа рдунеи" аҿы ашәҟәыҩҩы-ажурналист Шьаликәа Камкьиа абас иҩуан: "Ашыла кәаҳаны, џьыкахышла иҳәахны, кәакәарны ирӡуеит рыцыԥхьаӡа фба-фба цыра. Ашьҭахьы еицәажәахьаз аҭыԥҳацәа ркәакәарқәа рыманы, хы-мҩакы ахьеихагалоу иаангыланы, "сынасыԥ уаха ԥхыӡла дсырба", - ҳәаны, досу ртәқәа х-кәакәарк рфоит, нас џьаргьы ихьамԥшӡакәа, егьырҭ акәакәарқәа аҩныҟа иааргоит, уи ауха иахьышьҭамлац џьара иԥхьоит, ркәакәарқәа рыхчы иаҵаҵаны".