АҞӘА, жәабран 25 — Sputnik, Наала Аҩӡыԥҳа. Аҟәа иҭыжьуп Кавказ, Амшын еиқәа иахьаԥну изызҳауа аҵиаақәа ирԥырхагоу ахәаҷа-маҷақәа рсистемаркра ҳәаақәызҵо анапхгага. Абри атәы ҳаиҳәеит Ақыҭанхамҩа анаука-ҭҵааратә институт адиректор Лиосик Аиба.
"Апроблема ацәгьа-мыцәгьа анцәырҵлак акәӡам аӡбра ианалагатәу, уаанӡоуп. Ак анцәырҵлак, ауаҩы илшоит ашәҟәы аахыртны иара закәу аилкаара", — иҳәеит иара.
Ақыҭанхамҩа анаука-ҭҵааратә институт Аҟәа иҭнажьыз ашәҟәы аҟны иарбоуп аҵыхәтәантәи ажәашықәса рыла ицәырҵыз 14 инареиҳаны аҵиаақәа ирԥырхагоу ахәаҷа-маҷақәа. Иара аиқәыршәара иалахәын асубтропикатә культурақәа рзы Урыстәылазегьтәи анаука-ҭҵааратә институт аусуҩцәагьы.
"Ҳара ара инарҭбааны иаҳарбоит аԥхасҭа ахышәа-ҵышәа, уи аанкылашьас иамоу, иахьыҟоу аҭыԥ. Адиагноз узымдыруа ахәышәтәрагьы залшом. Ашәҟәы цхыраагӡахоит адиагноз ашьақәыргылараҿы", — иҳәеит Лиосик Аиба.
Аусеицурахь аҵарауаа хьанарԥшит аҵыхәтәантәи аамҭазы акырӡа зыӡбахә иалацәажәахьо амцаԥшьхәаҷа.
"Аолимпиатә обиектқәа рыргылараан арахь иааган хкырацәала аҵиаақәа. Адлер рхы цәырыргеит уаанӡа иаҳзымдыруаз ахәаҷа-маҷақәа. Нас Адлергьы аухараху. Арахь ишиасуагьы еилкаауп. Абри аҩыза аҭагылазаашьаҟны ҳколлегацәеи ҳареи иҳаӡбеит ашәҟәы аҭыжьра. Уи гәҽанҵагак еиԥшуп", — иҳәеит Аиба.
Ашәҟәы аус адырулон шықәсык иназынаԥшуа.
