Иаарту, илашоу, иҳалалу ауаҩы
Гәдоуҭа ақалақь аҟны инхо Асида Зыхәԥҳа лыӡбахә акыр шықәса раԥхьа исаҳахьан, лнапкымҭақәа џьашьахәуп ҳәа еиҭарҳәон, аха лареи сареи ҳабадырра уажәраанӡа изалыршахомыз.
Гәдоуҭаҟа амҩа ҳахьынӡақәыз сгәы хыҭхыҭуа сазыԥшын лара лбара, лабадырра, лаԥҵамҭақәа рыхәаԥшра, аха даҽа ганкахьалагьы сшәон ҳаизеилибамкаару ҳәа, ус схәыцрақәа срыман ишыҟаз ҳнадгылеит дара ргәашә, даҳԥылеит Асида Зыхәԥҳа лан Лиалиа.
Абаар ларгьы Асида аҩны дааҩныҵит — лара убысҟак иԥханы, лхы-лҿы еихаччо даҳпылеит, ҳгәыдкыланы аԥсшәа ҳалҳәеит, убри аминуҭаз сшәара зынӡаск иҟаӡамызшәа ицеит, лгәаартырала лара илылшеит ҳара иҳамаз ахәыцрақәеи, ашәареи шишамыз аарԥшра.
Асида Зыхәԥҳа 36 шықәса дырҭагылоуп, фы-мыз аналхыҵуаз инаркны лчымазара иахҟьаны лара илаҳаӡом иара убас дызцәажәаӡом, Санкт-Петербургтәи аҳақьымцәа адиагноз шьақәдыргылеит — аҿаҳадагәара.
"Асида фы-мыз лхыҵуан атит анлыхь, ашоура ӷәӷәа лыман уи нахыс сара избеит лыхьӡ шақәҿылымҭуаз, аҭак ҳәа акгьы шыҟалымҵоз, убри нахыс иалагеит ҳара ҳгәаҟрақәа, Аҟәа, Шәача, Санкт-Петербург ҳақьымцәас ҳзыдымҵаалаз ҳәа аӡәгьы дыҟам, аха акгьы лмыхәеит", — ҳәа лхәоит Асида лан Лиалиа.
Аԥсны Аџьынџьтәылатәи еибашьра алагаанӡа Зыхәаа рҭаацәа нхон Москва, Асида дныҟәон леиԥш зеиԥшыз ахәыҷқәа ахьныҟәоз ашкол ахь.
Иззыԥшымыз раԥхьатәи аԥҵамҭа
Лиалиа Зыхәԥҳа лажәақәа рыла, Москватәи арҵаҩцәа Асида дырҭахын, ибзианы илызныҟәон, зегьы дызреиԥшымыз еилыркаауан, убри азы акәхап дара рылаԥш еиҳа илхын. Иара убраҟоуп асахьаҭыхрахь илымаз аҟазара ахьаарԥшхаз.
"Асида 13 шықәса лхыҵуан раԥхьатәи лҭыхымҭа анслырба, уи сара сыззыԥшӡамыз хҭысхеит, даара сеигәырӷьеит. Иҷыдоу ашкол аҟны арҵаҩцәа еиуеиԥшым лабҿабатәи ахархәагақәа рырҭон, аус адырулон ахәыҷқәа- иҭыхуан, иақәҭырхуан. Усҟан лара лҟазара аарԥшхеит. Анаҩсан аус луан анышәыԥшь ала, дҭыхуан аҩыгақәеи ашәыгақәеи рыла, аха иахьа апластилин ала ауп лусумҭақәа шыҟалҵо", — ҳәа лҳәеит Асида лан.
Асида лнаԥкымҭақәа рылхәуп анышәаԥшь, аха еиҳарак излыху апластилин ауп, иара убас лхы иалырхәоит ацәа цқьа.
Аныҟәара, абара, агәаҭара, нас анапкымҭа…
Асида дхәыҷы аахыс бзиа илбоит аныҟәарақәа, илбо аԥсабара аԥшӡара лҽазылшәоит лусумҭақәа рыҟны рааԥшра. Амшыни, аԥҭақәеи, азараҟьа ашәҭқәеи рыла лгәышьҭыхра аатуеит. Аҭаацәа зегьы аԥхын аамҭазы Асида илзеиҿыркаауеит аныҟәарақәа, усҟан иаатуеит лара лгәацԥыҳәара. Асида лусумҭақәа зегьы ирныԥшуеит лгәалаҟазаара зеиԥшроу.
"Асида лусумҭақәа рыла еилукаауеит лгәалаҟазаара зеиԥшроу. Иҵегь маҷк даныхәыҷыз иҭылхуаз асахьақәа зегьы рылахь еиқәын, еиҳарак 15-16 шықәса данырҭагылаз. Апластилин ала аусура даналага инаркны рҽырыԥсахит лусумҭақәа. Асида аинтернет аҟны илбеит апластилин ала ишҭыхуа, убри инаркны иароуп аус злалуа", — ҳәа ацылҵеит ан.
Лиалиа Зыхәԥҳа, лажәақәа рыла Асида лгәалаҟазаара аныбзиам аусура напы алыркуам, ус иҟалалоит акыр аамҭа уск данаҿу даналгалак, нас мызкы-ҩымыз акгьы ҟалҵаӡом.
"Лгәалаҟазаара бзиазарц азы ҳҭаацәара зегьы лгәы иаҭаху ҟаҳҵоит. Аҳақьымцәа даныхәаҷыз дшәымжьалан, аиаша лашәҳәала ҳәа рҳәон, аха дышгәамҵуа анызбалак уи дацәысахьчоит сара", — ҳәа лҳәоит ан.
Бзиа илбоит дандырҽхәо
Асида лҟазшьа бзиуоп, даартуп, бзиа илбоит ахәыҷқәа, аха лусумҭақәа рыҟны ахәыҷқәа рхаҿсахьа аалырԥшӡом. Агәахәара ду лоуеит акыр аамҭа дызҿу аус анхлырқәшалагь, иара убас лнапқымҭақәа збо ауаа дандырҽхәо.
"Асида даартуп, бзиа илбоит асасцәа, ахәыҷқәа. Деигәырӷьоит лусумҭақәа ауаа ианыргәаԥхо, ҳамҭас ианрылҭо. Лусумҭақәа зегьы аԥсабара иадҳәалоуп, уи ауп лара еиҳа илзааигәоу", — лҳәоит лара.
Асида ауаҩы иаҳасабала лҟазшьа бзиазар, аха рҿиаҩык иаҳасабала лҟазшьа цәгьоуп уҳәар ауеит, уи шьақәнарӷәӷәоит лмаругақәеи, апластилини иҷабны ишлымоу, аус анылуа лхымҩаԥгашьеи.
"Ус ҟазшьас илымоуп, аус анылуа акрыфара шылҭаху лхашҭуеит, аус анылуа улыламкьысроуп, улԥырхагамхар ауп, насгьы иҟалҵаз лнаԥкымҭа ариашара ианалаго бзиа илбаӡом. Сара схала, схала ҳәа ауп дшыҟоу. Лмаругақәа аӡәгьы далакьысаргьы лҭахӡам", — ҳәа азгәалҭеит Лиалиа Зыхәба.
Асида идеиак анлызцәарҵлак илымоу амаругақәа дрыцклаԥшуеит, акы лзымхазар илыԥшаауеит, лҽеибылҭоит, нас аусура лнапы алыркуеит.
"Сахьак аиҿартәышьа лнапы аналылк, апластилин аашьҭыхны, лнапы аҟны илырԥхоит, хәҭа-ҳәҭала илшоит, анаҩсан иахьықәҟалҵо амаруга апластилин ахьылшьуа далагоит, асахьа ақәыҧшылара анышьақәларгылалак анаҩсан ашьшьыҳәа, еиқәҷаб аԥҵара лҽазылшәоит. Лара убысҟак, еилыхха иаалырԥшоит ахаҿсахьақәа иааџьоушьартә еиԥш. Усумҭак лымоуп, иара абла мацара мчыбжьык еиҳаны даҿын, акыр аамҭа дадхалеит", — ҳәа еиҭалҳәоит Асида лусушьазы лан.
Анышәаԥшьи, апластилини, аҩыгақәа рылеи иҟаҵо лаԥҵамҭақәа иаарылукаартә иҟоуп акинофильм "Аватар" аҟнытә иаалырԥшыз ахаҿсахьа.
Гәыӷрала иҭәу
Лиалиа Зыхәԥҳа лажәақәа рыла, Асида бзиа илбоит арабтә мотивқәа злоу афильмқәеи, асахьақәеи, ателехәаԥшрала ицо зегьы дазҿлымҳауп, лара еиҭаганы илалҳәоит.
"Бзиа дылбоит актиор Арнольд Шварценеггер, иареи ихәыҷқәеи рымш ира аныҟоу инамаркны зегьы лдыруеит, аинтерент аҟны дацклаԥшуеит иԥсҭазаара, лассы-лассы иҭылхуеит иара ихаҿсахьақәа", — ҳәа лҳәоит ан.
Асида лҟазара иацклаԥшуа лҭаацәеи, лгәылацәеи рзы иџьашьатәны иҟалеит аҭел (проволока) иалхны иҟалҵаз атерминатор ихаҿсахьа.
"Уамашәа иаабеит даналга ари ахаҿсахьа, данаҿызтәи апроцесс атәы аҳәара уадаҩуп, избан акәзар уи лҽазҵәылхны даҿын, ҭел цыԥхьаӡа лнапы иҵылхит, убасҟак еилыхха иаалырԥшыр лҭахын лнапкымҭа", — ҳәа азгәалҭеит лара.
Асида ҟазарала игәылҭәаау, гәыӷрала иҭәу ҭыԥҳауп. Лара гәазыҳәарас илымоуп бзиа илбо актиор Арнольд Шварценеггер ибжьы лаҳарци, дахьыиз дахьааӡаз иқалақь Таль (Австриа) аҟны ацареи, ауаа рбара, рааигәа аҟазаара, лхатәы цәыргақәца аиҿкаареи.
Асида Зыхәԥҳа лырҿиара иазку авидеонҵамҭа шәахәаԥшыр ҟалоит абра
