АҞӘА, абҵара 21 – Sputnik, Бадри Есиава. Афонтәи аҳаԥы аартҩы Гиви Смыр ихьӡ иааиртыз аҳаԥы иахҵахарц ажәадгала ҟарҵеит Гиви Смыр ицеибашьуаз, аекскурсиатә обиект аусзуҩцәа.
"Гиви Смыр 4-тәи абатальон аиҳабыс даман. Иара иоуп аибашьра ашьҭахь Баслахә ақыҭан иҭахаз аибашьцәа рбаҟа аартра аԥшьызгаз. Иара ҳҩызцәа шихамшҭуаҳз еиԥш ҳаргьы иара даҳхаҳмыршҭыроуп. Гиви ицеибашьуаз рыхьӡала аҳәара ҟасҵоит иара иааиртыз аҳаԥы ихьӡ ахҵазарц", — иҳәеит Валери Аҩӡба аграждантә панихидаҿы.
Иара абри аҩыза аҳәара ҟарҵеит аҳаԥы аусзуҩцәагьы. Аԥсны Аҩныҵҟатәи аусқәа рминистр Аслан Кобахьиа иазиԥхьаӡоит иара усгьы аҳаԥи Гиви Смыри рыхьӡқәа еидҳәалоуп акыр жәашықәса ҳәа. Уи официалла ашьақәырӷӷәӷәара аамҭа ааиит иҳәеит иара.
Гиви Смыр диит лаҵарамза 9 1945 шықәса рзы Афон ҿыц. Иара ахаангьы иусумҭақәа инапы рыҵаиҩӡомызт. Ссахьаҭыхҩуп ҳәагьы ихы ишьомызт.
