АҞӘА, хәажәкыра 9 – Sputnik, Рада Ажьиба. Аспорт жәларбжьаратәи акласс азҟаза Русҭам Амԥари аспорт азҟаза Осман Џьугьелиеи рхы аладырхәраны иҟоуп хәажәкыра 10-12 рзы имҩаԥысраны иҟоу зых иақәиҭу ақәԥаразы Жәларбжьаратәи атурнир. Абри атәы Sputnik иазааицҳаит зых иақәиҭу ақәԥараз Аԥсны еизгоу акоманда азыҟаҵаҩ Џьарназ Бениа.
"Ари атурнир ахь аԥсуа спортсменцәа официалла инаԥхьоуп. Ареспублика ахьӡала иқәгылараны иҟоуп аспорт жәларбжьаратәи акласс азҟаза Русҭам Амԥари аспорт азҟаза Осман Џьугьелиеи. Дара 61 кьыла рҟынӡа акапан змоу аспортсменцәа ирылахәны иқәгылоит хәажәкыра 11 рзы", — иҳәеит Џьарназ Бениа.
Иара иажәақәа рыла атурнир далахәхараны дыҟан аԥсуа спортсмен Баџьгәыр Хәытабагьы, аха уи ишьапы ааха ахьаиуз иахҟьаны атурнир аҟны дзықәгылом.
"Ҳаспортсменцәа Москва аҽазыҟаҵарақәа мҩаԥыргоит. Сгәы иаанагоит Османи Русҭами алҵшәа бзиақәа аадырԥшып ҳәа. Сара уажәы Буриатиаҟа изгоит Аԥсны абираҟи аԥсуа гимни", — иҳәеит иара.
Атурнир иалахәхоит 11 тәыла рҟынтәи 100-ҩык рҟынӡа аспортсменцәа. Зых иақәиҭу ақәԥаразы Буриатиа имҩаԥысраны иҟоу атурнир иалахәхоит Урыстәыла, Аԥсны, Иапониа, Китаи, Манголиа, Беларуссиа, Таджикистан рҟынтәи иреиӷьу аспортсменцәа. Актәи аҭыԥ зго ианашьахоит 90 000 мааҭ, аҩбатәи – 60 000 мааҭ, ахԥатәи – 30 000 мааҭ.
