АҞӘА, мшаԥы 13 – Sputnik. Аԥсны Апарламент адепутатцәа алахәуп Алада-Урыстәыла апарламенттә Ассоциациа XXVIII Аконференциа. Абри атәы Sputnik иазеиҭеиҳәеит Апарламент адепутат Гиви Кәарҷиа.
"Аԥснытәи аделегациа хадара азиуеит Баҭал Табаӷәуа. Сара салахәын абиуџьеттә политика аилак аусура, Баҭал Табаӷәуа далахәын азинтә политика аилак аусура, Асҭамыр Ҭарба–аграртә усураз аилак аусура" ҳәа еиҭеиҳәоит Кәарҷиа.
"Аладатәи афедералтә округ азакәанԥҵаратә еизарақәа русура ҳхы ҳзаламырхәуазаргьы, аԥышәа рымаадоит", — иҳәеит иара.
Афорум аҿы иалацәажәан акапиталтә ргылара аобиектқәа, урҭ ркадастртә ҭаҩра, адгьылтә малқәа рхархәараз ашәарақәа рымҩаԥгара уҳәа еиуеиԥшым азҵаарақәа ҳәа далацәажәоит адепутат.
"Ҳареи ҟрымтәи азинԥҵаратәии анагӡаратәии мчрақәеи ҳаицәажәара иалҵшәахар алшоит Аҟәеи Симферополи егьырҭ Ҟрым ақалақьқәеи рыбжьара атранспорттә еимадара ашьақәыргылара", — иҳәеит Кәарҷиа.
Иара убасгьы амшынтә еиҭанеиааираҿ аусеицурагьы аԥеиԥш аманы ҳахәаԥшуеит ҳәа иҳәоит иара.
"Уажәы аус ауеит Шәачанӡа иааӡо амшын-ӷба амаршрут. Ажәадгала ҟаҳҵеит уи амаршрут Аҟәанӡа иацҵахарц", — иҳәоит иара.
Асеиԥш иҟоу ажәадгалақәа анагӡара роур, Аԥсны атуристтә хырхарҭа ҿио иҟалоит иҳәеит адепутат.
Мшаԥы 12 рзы Ҟрым иаатит Алада-Урыстәыла апарламенттә Ассоциациа XXVIII Аконференциа. Афорум мҩаԥысуеит мшаԥы 12-13 рзы.
