АҞӘА, рашәара 28 – Sputnik, Бадри Есиава. Зықәра намӡац рганахьала ацәгьоуразы аҭакԥхықәра арӷәӷәаразы рыбжьы рҭиит Апарламент адепутатцәа имҩаԥысуа аизараҿы.
"Ҳара ажәалагала ҟаҳҵоит аус зуа Ашьаустә закәанеидкылаҿы зықәра намӡац рганахь ала асексуалтә ҟазшьа змоу ацәгьоурақәа рымҩаԥгаразы аԥсахрақәа алагалазарц. Аҵыхәтәантәи аамҭақәа рзы ҳтәылаҿы аҭыԥ рыман ажәлар зегьы агәҭынчымра рызцәырызгаз асеиԥш иҟаз ацәгьоурақәа", — иҳәеит Апарламент адепутат Алхас Џьынџьал, азакәан апроект ҿыц адепутатцәа ирыдгало.
Иара иазгәеиҭеит иахьазы аус зуа азакәан аҿы абарҭ реиԥш иҟоу ацәгьоурақәа рганахь ала аҭакԥхықәра ԥсыҽуп, уи еиҳа ирӷәӷәатәуп ҳәа ишазырыԥхьаӡо напхгара зиҭо аилак аҿы.
Аԥсны Жәлар реизара адепутатцәа актәи аԥхьарала азакәан апроект адкыларазы рыбжьы рҭиит.
