АҞӘА, цәыббра 7— Sputnik. Аԥсни Шьамтәылеи рнапы аҵарҩит аиҳабырабжьаратә еиқәшаҳаҭра аекономикатәи, ахәаахәҭратәи, анаукатәи, атехникатәи, акультуратәи усеицуразы Аицеилак аԥҵаразы. Иара убасгьы анапы аҵаҩуп аиҳабырабжьаратә еиқәшаҳаҭра аекономикатә усеицурази ахәаахәҭра аусхк аҟны аицхыраарази. Абри атәы аалыцҳауеит Аԥсны Ахада ипресс-маӡаныҟәгаҩ Наала Аҩӡԥҳа.
"Ҳара даара агәахәара ҳнаҭоит шәара арахь шәаара. Ҳара ахә ҳаракны иаҳшьоит иаҳзыҟашәҵо адгыларазы. Агәра згоит Шьамтәылатәи ареспубликеи Аԥсны Аҳәынҭқарреи реизыҟазаашьақәа ԥхьаҟагьы аҿиара шроуа", — иҳәеит Имад Хамис.
"Ҳара ҳзынгьы ари ҭоурыхтә хҭысуп. Аԥсны аофициалтә делегациа раԥхьаӡа акәны шәыдгьыл иаҭааит. Ҳара иҳалшо зегь ҟаҳҵоит ҳаизыҟазаашьақәа ҳажәларқәа рзы хра рыманы иҟазарц", — иҳәеит аҭакс Рауль Ҳаџьымба.
Аиҳабырабжьаратә еиқәшаҳаҭра аекономикатә усеицурази ахәаахәҭра аусхк аҟны аицхыраарази рнапы аҵарҩит Аԥсны аекономика аминистр Адгәыр Арӡынбеи Шьамтәыла аекономикеи ахәаахәҭреи рминистр Самир Халили.
Аиҳабырабжьаратә еиқәшаҳаҭра аекономикатәи, ахәаахәҭратәи, анаукатәи, атехникатәи, акультуратәи усеицуразы Аицеилак аԥҵаразы рнапы аҵарҩит Аԥсны адәныҟатәи аусқәа рминистр Даур Ақаҩбеи жәларбжьаратәи аусеицуразы аилак Ахада Имад Сабуни.
Цəыббрамза 4 рзы Аҧсны Аҳəынҭқарра Ахада Рауль Ҳаџьымба официалтə ныҟәарала Шьамтəылатəи Арабтə Республика даҭааит.
Аҧсны Аҳəынҭқарра Ахада напхгара ззиуа аделегациа аилазаараҿы иҟоуп: Аҧыза-министр Геннади Гагəылиа, Ахада Иусбарҭа анапхгаҩы Беслан Барцыц, Ашəарҭадара Ахеилак амаӡаныҟəгаҩ Муҳаммед Кьылба, Адəныҟатəи аусқəа рминистр Даур Ақаҩба, Атəылахьчара аминистр Мираб Қьышьмариа, Аекономика аминистр Адгəыр Арӡынба.
