АҞӘА, жьҭаара 22— Sputnik, Сариа Кәарацхьелиаԥҳа. ВГИК астудентка Атана Агрԥҳа лкинофильм аҭыхра иалагеит Аҟәа ҳәа Sputnik акорреспондент илзеиҭеиҳәеит акинопроект апродиусер Александр Басариа.
Акинопроект усутә хьыӡны иамоуп "Адгьыл аиҭеира". Иара алацәажәоит аҭаацәара-ҿа ақыҭаҿтәи рыԥсҭазаара. Афильм аԥсышәала иҭыххоит, урысшәала асубтитрқәа аиуеит.
"Атана аԥсуа қыҭа аҭоурых далацәажәоит. Иуадаҩын ВГИК аҭыхрақәа Аԥсны рымҩаԥгара ақәыршаҳаҭра. ВГИК ахәҭакахьала аҭыхрақәа еиҿнакаауеит атехникала. Уи арахь аагара мариамызт. Аха акультура аминистрреи Москва иҟоу аԥсуа диаспореи ацхыраара руит. ВГИК 25 шықәса рыҩныҵҟа раԥхьаӡа акәны Аԥсны апроект мҩаԥнагоит", — иҳәеит Александр Басариа.
Хымш ирықәуп аҭыхрақәа мҩаԥысуеижьҭеи. Афильм иалахәуп Аԥсуа драматә театр актиорцәеи Борис Шьукин ихьӡ зху атеатр аушьҭымҭацәеи.
Афинанстә проблемақәа инарыдҳәаланы аҭыхрақәа раамҭа ԥкуп.
"Афинанстә проблемақәа ҳамоуп. Ҳгәы иаанагон Аԥсны ацхыраара ҳауп ҳәа, аха аԥсуа бызшәа аҿиара, акинемотограф аҿиара рацәак хырҩа амам", — иҳәеит апродиусер.
Афильм ахронометраж— 35-40 минуҭ иҟалап ҳәа иазыԥхьагәаҭоуп. Аԥхьарбара мҩаԥысраны иҟоуп ВГИК аҿы.
