АҞӘА, абҵара 13– Sputnik. Аушьҭырҭатә ҭыԥ "Адлер" аҿы даанкылан 27-шықәса зхыҵуа Еквадор атәылауаҩ. Иара Аԥсныҟа визада аара игәҭакын ҳәа аанацҳауеит Урыстәыла АШәМ Аҳәаахьчаратә усбарҭа апресс-маҵзура.
Аҳәынҭқарратә ҳәаа аилагара адагьы иааԥшит Еквадор атәылауаҩ Урыстәыла аҵакыраҿы иҟазаарагьы азакәаншьаҭа шамамыз. Иара ара иҟазаара аҿҳәара цахьан.
Административтә еилагаразы аус хацыркын. Аҳәаа еилазгаз Адлертәи араионтә ӡбарҭахь днаганы ахараԥса иқәҵаны атәыла далырцеит.
Уи адагьы иҟалаз инадҳәаланы иара 5 шықәса рыҩныҵҟа Урыстәыла алалара азин имхуп.
