АҞӘА, ԥхынҷкәын 7 - Sputnik, Сариа Кәарацхьелиаԥҳа. Ахәыҷтәы хореографиатә ансамбль "Гагрыԥшь" афонд "Ашана" хылаԥшра знаҭо ахәыҷқәа рзы имҩаԥнагоит агәыҳалалратә концерт, абри атәы Sputnik иазеиҭалҳәоит афонд "Ашана" ахаҭарнак Есма Ҳагԥҳа.
Ансамбль "Гагрыԥшь" Москва агәыҳалалратә концерт мҩаԥнагоит асабша, ԥхынҷкәын 8, асааҭ 17:00. рзы ГИТИС асценаҿ.
"Аҵыхәтәантәи амшқәа рзы ауаа активла абилеҭқәа аархәоит. Аконцерт амш аҽны урҭ рхыԥхьаӡара еиҳагьы еиҳахап ҳәа сгәыӷуеит. Иҟоуп аконцерт ахь анеира злымшо, аха урҭ афонд аԥара ахырыԥхьаӡалоит", - ҳәа еиҭалҳәоит Ҳагԥҳа.
Афонд апроект ҿыц "Гәык аҟынтәи аҽа гәык ахь" аҳәаақәа ирҭагӡоуп "Гагрыԥшь" аконцерт.
"Ҳара иаҳҭахуп апроект меценатк иҟынтәи аҽа меценатк иахь инеиуа иҟаларц. Аԥхьа уи амҩаԥгара ргәаҳәеит ахәыҷтәы ансамбль алахәылацәа. Уи даара угәы ҟазҵо акоуп. Ҳара ҭабуп ҳәа раҳҳәоит ахәыҷқәа реиԥш урҭ рҭаацәарақәагьы, ансамбль Москваҟа ацареи аҟазаареи рыхәԥса иахьаҵагылаз азы", - ҳәа еиҭалҳәоит Ҳагԥҳа.
Аконцерт аҳәаақәа ирҭагӡаны имҩаԥгахоит ахәыҷтәы ҟазара ацәыргақәҵа "Аԥснытәи аӡын".
