Асмаҭ Ҵәыџьԥҳа, Sputnik
Ашьыжь асааҭ ааба рзы Апарламент ахыбра аҿаԥхьа ауаа рацәа шгылоугьы иҭынчроуп. Арҭ реиҳараҩык иҷаԥшьоз роуп. Иҟоуп ашәахьа ашьыжь аахыс игылоугьы, иҟоуп аамҭа-аамҭала зҽызыԥсахуа.
"Ҳара изныкымкәа атәыла ахада иахь аҳәара ҟаҳҵахьан алхрақәа рыҿҳәара инахазарц, аха иаҳҳәоз аӡәгьы илымҳаҟынӡа инеимгеит. Акциа мҩаԥыслоит иахәҭаны иахьынӡаҟоу", - иҳәеит акциа алахәыла Лесик Чамагәуа.
Амитинг алахәылацәақәак абра аҵх рхыргеит. Аҵх рхыргеит азинхьчаратә органқәа рхаҭарнакцәагьы. Иҟоуп уахыки-ҽнаки инеиԥшьны зшьапы иқәгыло. Цәажәараны ирҳәоит рылымшара иахҟьаны амедицинатә цхыраара зҭаххазгьы ыҟоуп ҳәа.
Ашьыжь, асааҭ жәаба рахь инеиуаны ирылаҩит Бзыԥ ақыҭан амҩа ҭадырцәит ҳәа.
"Ацентртә автотрасса аркра агәҽанҵаратә ҟазшьа акәын иамаз. Убри азы иӡбан акциа уахынланы амҩаԥгара – амҩаҿ аныҟәарақәа рхыԥхьаӡара анырацәамыз. Абри аумҭала ҳара иаҳҭахын анапхгара аҭагылазаашьа ауадаҩра дҳарбарц", - иҳәеит аоппозициаа рхаҭарнак Ҭеимураз Хышба.
Аҵыхәтәантәи аҭагылазаашьақәа амҩакрахь икылыргеит
Абри ажәабжь ашьҭахь аоппозициа ахаҭарнакцәеи атәыла амчра рхаҭарнакцәеи еиланагалеит. Уи зыхҟьаз Апарламент ахыбраҿы аколонкақәа афымцатә розетка аҿакра ахьзалмыршахаз ауп.
"Иаҳҳәарц иаҳҭаху усгьы иаҳҳәоит", - рҳәеит еизаз.
ААР аусзуҩцәа еиҿанагалаз еиҟәырхит.
