АҞӘА, жәабран 1 - Sputnik. Алхратә комиссиа хадаҟны иҭарҩит Кан Кәарҷиа Аԥсны ахадарахьы кандидатс иқәыргыларазы аԥшьгаратә гәыԥ. Абри атәы Sputnik иазеиҭалҳәеит АКХ амаӡаныҟәгаҩ Ануш Хоџьикиан.
Кан Кәарҷиа Аҟәа ақалақь ахадара инапынҵақәа рынагӡаҩыс дарҭеит жьҭаара 21, 2019 шықәса рзы.
Кан Кәарҷиа диит ԥхынгәы 1, 1974 шықәсазы Тҟәарчал ақалақь аҟны. 1991 шықәсазы далгеит Аҟәатәи абжьаратә школ № 10, дҭалеит Аԥснытәи аҳәынҭқарратә университет аҭоурых-зиндырратә факультет "азинҭҵаара" азанааҭ ала.
2007 - 2011 шш. – Аҟәатәи ақалақьтә еизара, анхарҭа-коммуналтә нхамҩа азҵаарақәа рзы акомиссиа ахантәаҩы.
2012 - 2017 шш. – Аԥсны Аҳәынҭқарра Жәлар Реизара адепутат, аграгртә политикеи, аԥсабаратә хыҵхырҭақәеи, аекологиеи рзы аилак ахантәаҩы.
1992-1993 шш. рзтәи Аԥсны жәлар Рџьынџьтәылатә еибашьра аветеран, Леон ордени "Агәымшәаразы" амедали ианашьоуп. Дҭаацәароуп, хҩык ахшара драбуп.
Алхра ҿыцқәа рымҩаԥгаразы аӡбамҭа рыдыркылеит 2019 шықәсазы имҩасыз алхрақәа рзы АКХ иҟанаҵаз алкаақәа Иреиҳаӡоу аӡбарҭа ахашшааратә инстанциа иашамызт ҳәа ианаӡба ашьҭахь. Аԥсны АКХ иҭанаҩхьеит ахада икандидатура ақәыргыларазы иадҵаалаз аполитикатә партиа "Акзаареи" Аслан Бжьаниа иқәыргыларазы аԥшьгаратә гәыԥи.
Иара убас шәаԥхьар ҟалоит:
-
Ақалақь ахада инапынҵақәа назыгӡо аҳҭнықалақь ахаҿра еиҭеикуеит
-
Кан Кәарҷиа Аҟәа ақалақь ахадара аусзуҩцәа рыԥсахразы: аҳәаҭыхла срыламлеит
