16:41 21 Цәыббра 2020
Ишиашоу ицо аефир
  • USD76.04
  • EUR90.01
Аԥсны
Икьаҿу ахьарԥш аиура
31 0 0

Ҩышықәсоуп урыстәылатәии аԥснытәии археологцәа заа антикатәи ақалақь Гиунос ахьыҟаз Очамчыра аԥшаарақәа мҩаԥыргоижьҭеи.

АҞӘА, цәыббра 3 – Sputnik. Очамчыра ихдыркәшеит урыстәылатәии аԥснытәии археологцәа изаамҭанытәиу рыдәнытә сезон. Аԥшаарақәа раан археологцәа ирымԥыхьашәеит хәы змоу аԥшаахқәа ҳәа Sputnik иазеиҭеиҳәеит аекспедициа анапхгаҩы Аркади Џьопуа.

"Ирацәаны аматериал ԥшаауп. Уажәы ҳара заатәи Абжьарашәышықәсеи антикатәии аҩаӡараҿ ҳаҟоуп. Иара убасгьы иҳамоуп еиуеиԥшым аамҭақәа ирыҵаркуа аматериалқәа: антикатәи аамҭа иатәу лак еиқәаҵәала ишәу ачысмаҭәа реиԥш иҟоу. Ахаҳә ҟьаҟьақәа (плинфы) ракәзар ҵыԥхтәи ҳаԥшаарақәа раан арамеи бызшәала аҩырақәа зныз аабеит. Сынтәа иҳамԥыхьашәеит абырзен бызшәала аҩыра зныз аплинфақәа. Сергеи Мирон-иԥа Шамба иҭиҵаахьан V-VI ашәышықәсақәа ирыҵаркуаз абаа. Ара иаабеит акыцлых, аҭыԥантәи аиԥш иаагоугьы", - еиҭеиҳәоит Џьопуа.

Аекспедициа иалахәуп 17 – 20-ҩык. Аиҳараҩык урыстәылантәи аволонтиорцәеи ААУ аҭоурыхтә факультет актәи акурс астудентцәеи роуп.

Џьопуа иазгәеиҭеит аԥшаахқәа зегьы Аԥсны ишаанхо. Еиҳа хәы зманы ишьахо амузеи иааарҭоит, мамзаргьы аҵәахырҭахь инарышьҭуеит.

Анапхгаҩы ишиҳәо ала аекспедициа ҽаангьы иацҵахоит.

"Ирацәоуп иҟаҳҵаша. Сынтәа аԥкырақәа иҳарҭаз аамҭала аус аауит, уи 20-22 мшы. Иҳауит алҵшәа бзиақәа, аԥшаахқәа", - иҳәеит иара.

Археологиатә жырақәа еицымҩаԥыргоит РАН археологиеи мрагылараҭҵаареи р-Институти, Аԥснытәи аҳәынҭқарратә музеии, Аԥснытәи агуманитартә ҭҵаарақәа р-Институти русзуҩцәа. Ҽааны аԥсуа-аурыс експедициа иахыҵуеит - 20 шықәса.

Ихадоу атемақәа