АҞӘА, абҵара 16 – Sputnik. Аԥсны аҩнуҵҟатәи аусқәа рминистрра аусҭҵаара хацнаркит хаҵеи ԥҳәыси Ирен Сангәлиаԥҳаи Рудольф Базбеи рганахьала Аԥсны Ашьаустә закәанеидкыла ахәҭаҷ 156 инақәыршәаны ҳәа аанацҳауеит аусбарҭа апресс-маҵзура YouTube аҿы.
Арепортаж аҿы ишҳәо ала, Аԥсны атәылауаҩык асоциалтә ҳақәа рҿы ҭыԥҳак длабадырит. Уи ашьҭахь дара гәыла-ԥсыла еизааигәахеит, анаҩстәи аизыҟазаашьақәагьы мап рцәырымкыртә аиԥш. Аха, нас ишеилкаахаз ала, аҭыԥҳа ԥшӡа лықәшәара ацынхәрас амц-цәгьоуцәа аинформациа рхы иархәаны ахаҵа ашантаж изыруа иалагеит.
Аҭагылазаашьа уадаҩ иҭашәаз ахаҵа анаҩс рыҽимардеит хаҵеи ԥҳәыси Ирен Сангәлиаԥҳаи Рудольф Базбеи. Дара ахаҵа иарҳәеит иҟам-ианымыз ахакер ицхыраарала аинформациа зегьы аинтернет ишизанырхуа.
Ахаҵа иеиқәырхара ахәԥса 120 нызқьмааҭ ақәырҵеит. Ахаҵа агәыҩбара иоуит арҭ ауаа рганахьала, амилициагьы адырра риҭеит. Аԥсны ААР Ашьаусԥшаара аусбарҭа агәыԥи Аҟәа ААР Ашьаусԥшаара аусбарҭа аусзуҩцәеи русеицурала ишьақәыргылан ацәгьоуцәа рхаҭарақәа.
Ацәгьоуцәа аԥара аныргоз аамҭазы иаанкылан 80 000 мааҭ рызназгаз ахаҵа иҟынтәи. Аԥсны ААР аусзуҩцәа дара ахьынхоз аҭыԥ аҿы аԥара рацәеи ателефонқәеи рыԥшааит.
Ирен Сангәлиаԥҳаи Рудольф Базбеи рҿы рықәшаҳаҭхеит.
Дара рганахьала ашьаус хацыркуп "мцҳәарыла ирацәаны аԥарарҳара" ахәҭаҷ ала. Иара убас ашьаус аҟынтәи иааԥшит абри аҩыза ацәгьоурақәа даҽа ҩба шыруз азы гәҩара. Ашьаусҭҵаара иацҵоуп.
