АҞӘА, ԥхынҷкәын 2– Sputnik. Аилацәажәараҿы Аслан Бжьаниа "араионқәа рпаспорт" еиҿкаазарц адҵа ҟаиҵеит ҳәа иҳәеит Sputnik аинтервиу азҭаз Гәылрыԥшь араион ахада Аслан Бараҭелиа.
"Аилацәажәараҿы атәыла ахада Аслан Бжьаниа "араионқәа рпаспорт" еиҿкаазарц адҵа ҟаиҵеит. Дарбанызаалак ахада араион аԥшәмак иҳасабала ираион аҿы иҟоу идыруазароуп",- иҳәеит Бараҭелиа.
Иара иажәақәа рыла арегионқәа рпаспортқәа аԥҵатәуп. Уа иарбазароуп аинформациа ақыҭанхамҩатә хархәара змоу адгьылқәа рзы, аусуралшара змоу ауааԥсыра рхыԥхьаӡараз, ахәыҷқәа заҟаҩ ыҟоу, ашколқәа азхо иазымхо, амҩақәа рҭагылазаашьа уҳәа ихадоу егьырҭ аусхкқәа рзы
Бараҭелиа иҳәеит "араионқәа рпаспорт" арегионқәа рхадацәа еиҳа еилыкка иднарбоит напхгара зырҭо араионқәеи ақалақьқәеи рҟны аҭагылазаашьа зеиԥшроу.
Аиԥылара далахәын ахада Иусбарҭа анапхгаҩы Алхас Кәыҵниа, ихаҭыԥуаа Саида Быҭәԥҳа, Џьансух Нанба, Зураб Қаџьаиа, Аԥсны АШәМ ахантәаҩ ихаҭыԥуаҩ Тимур Ахьиба.
