АҞӘА, ажьырныҳәа 8– Sputnik. Аепидемиа иалагеижьҭеи Аԥсны акоронавирус зцәа иаланы рыԥсҭазаара иалҵхьеит 140-ҩык, абри атәы аанацҳауеит Ауааԥсыра COVID-19 рацәыхьчаразы аоперативтә штаб.
Ажьырныҳәа 6 инаркны акоронавирус ззышьақәырӷәӷәаз апациентцәа ԥшьҩык рыԥсҭазаара иалҵит.
Ажьырныҳәа 6 рзы, гәдоуҭатәи ахәышәтәырҭаҟны дыԥсит 1949 шықәса рзы ииз апациент. Ажьырныҳәа 7 рзы аҟәатәи аҿкычымазаратә хәышәтәырҭаҟны лыԥсҭазаара далҵит 64 шықәса зхыҵуаз аԥҳәыс. Дара ирзышьақәырӷәӷәан адиагноз "акоронавирустә инфекциа ҿыц".
Ажьырныҳәа 6 рзы амобилтә госпиталь аҟны адиагноз "акоронавирустә инфекциа ҿыц", зыхәышәтәра хьанҭаз ачымазара хада "ҩ-ганктәи ихьанҭоу аполисегментартә гәыҵәкра" ззышьақәырӷәӷәаз ҩыџьа аҳәса рыԥсҭазаара иалҵит, 1943, 1936 шықәсқәа рзы ииз.
Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 89-ҩык, урҭ рахьтә 74-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 19-ҩык. Аҟәатәи аинфекциатә хәышәтәырҭаҿы ирхәышәтәуеит акоронавирус зцәа иалоу 36-ҩык апациентцәа, Очамчыра ирхәышәтәуеит 15-ҩык, Тҟәарчалтәи ахәышәтәырҭаҿы - 15-ҩык, Гагратәи ахәышәтәырҭаҿы - 30-ҩык. Аҟәатәи амобилтә хырхарҭарацәатә госпиталь аҟны ишьҭоуп акоронавирус зыдбалоу 43-ҩык апациентцәа.
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 9613-ҩык ыҟоуп. Урҭ рахьтә ргәы бзиахеит 7224-ҩык.
Акоронавирус иазку ажәабжьқәа зегьы шәрыԥхьар ҟалоит абра>>
