09:19 26 Жәабран 2021
Ишиашоу ицо аефир
  • USD73.47
  • EUR89.50
Аԥсны
Икьаҿу ахьарԥш аиура
ЕгрыГЕС атоннель аремонт (33)
16 0 0

Афымцастанциа адеривациатә тоннель аҭагылазаашьа даара иуашәшәыраны иҟоуп.

АҞӘА, ажьырныҳәа 20  - Sputnik, Сариа Кәарцхьиаԥҳа. Ажьырныҳәа 20 инаркны ЕгрыГЕС аусура хымз ҳәа иаанкылахоит.

2021 шықәса мшаԥымза анҵәамҭанӡа астанциаҿы имҩаԥыслоит адеривациатә тоннел аиҭашьақәыргылара. Ҩ- километраки бжаки иҟоу ахәҭа аремонт азутәуп. Зынӡа атоннель аура 15 километра иҟоуп.

АУН "Амшынеиқәафымцамч" адиректор Михаил Логәуа иҳәеит иахьанӡа арахьынтәи алашара шроуаз Гәылрыԥшь, Очамчыра, Тҟәарчал, Гагра араионқәа. Асааҭ 11:00 рзы урыстәылатәи аҟазауаа арҭ араионқәа урыстәылатәи афымцамчхара раҵаркразы иахәҭаны иҟоу аусурақәа мҩаԥыргоит.

"Иахьа асааҭ 00:40 рзы Аԥсны иааиит урыстәылантәи алашара. Уи ЕгрыГЕС аанкылара иадҳәалоуп. Аԥсны иҟоуп урыстәылатәи аҟазауаа. Дара аусурақәа рыдыркылоит. Афымцалашара ацәаҳәала аиура анеиҿыркаалак ашьҭахь ЕгрыГЕС аусура нкылахоит, аремонт иалагоит", - иҳәоит Логәуа.

ЕгрыГЕС анапхгараҭара ахантәаҩы Леван Мебониа иажәақәа рыла, афымцастанциаҿы зегьы азыхианы иҟоуп аремонттә усурақәа рылагаразы. Уи мҩаԥгахоит Аԥсны ахы инаркны аҵыхәанӡа урыстәылатәи афымцалашара аиура ишалагалак.

"Макьана аремонт ҳаламгацт. Ҳазыԥшуп Аԥсны урыстәылатәи афымцалашара адкылара. Уи шаамҩаԥгахалак астанциа аанаҳкылоит, аремонт усурақәа ҳрылагоит. Шьыбжьышьҭахь акәхоит ҳәа ҳгәыӷуеит. Агенераторқәа аанаҳкылоит, атоннель ҭаҳарцәуеит. Уи азы ԥынгылак ыҟам макьаназ", - иҳәеит Мебониа.

ЕгрыГЕС адеривациатә тоннель аремонт алагара арыцхә азыԥхьагәаҭан 2021 шықәса жәабранмзазы, аха ииагоуп ажьырныҳәа 20 ахь. Аремонт лаҵарамзанӡа ианзалымга аӡеизакырҭа ӡыла ирызмырҭәыр алшоит. Уи апроблемақәа цәырнагоит.

Аиҭашьақәыргылара мҩаԥнагоит ақырҭуа ргыларатә еилахәыра, анемец ҟазауаа рыпроект ала. Аԥарашәара мҩаԥнагоит Европатәи арҿиара абанк. Иахьазы Аԥсны Урыстәылантәи афымцалашара аиуеит. ЕгрыГЕС адеривациатә тоннель аҵыхәтәантәи аремонт мҩаԥган 2006 шықәса рзы, ашәарҭадара атехника ишаҳәо ала ес-хәышықәса аҭагылазаашьа ишашьклаԥшлатәу. Уажәы аӡы ахьацәцо азы 250 миллион киловатт сааҭ ыӡуеит. Ари Аԥсны шықәсык ала ахы ианархәо афымцалашараҟынтә 10% артәоит.

Ԥхынҷкәын 11 раахыс Аԥсныҟа алашара аашьҭра иалагахьеит Урыстәыла, аԥснытәи аган аҳәарала.

ЕгрыГЕС заҵәык Ауп Аԥсны аҵакыра зегьы фымцалашарала еиқәзыршәо. Иара ахархәарахь ирыҭан 1978 шықәса рзы. Агидроагрегатқәа Аԥсны аҵакыраҿ игылоуп, аӡеизакырҭа – Қырҭтәыла. Астанциа ашықәсбжьаратә фымцамч аужьра х-миллиардки 700 миллион киловатт ыҟоуп сааҭк ала.

Иара убас шәаԥхьар ҟалоит:

Атемақәа:
ЕгрыГЕС атоннель аремонт (33)

Ихадоу атемақәа