АҞӘА, лаҵара 20 - Sputnik. Қьамал Арӡынба ишьра далахәын ҳәа агәҩара ззыҟоу Аԥсны атәылауаҩ, 1992 шықәса рзы ииз Ԥлиа Баҭал Нодар-иԥа даанкылоуп, абри атәы аанацҳауеит Аԥсны Апрокуратура хада асаит.
Қьамал Арӡынба дшьын лаҵара 18 рзы Аҟәа. Уи ашьҭахь ауаҩшьра ҟазҵаз ацәгьоуҩы иаанкыларазы аплан рыланаҳәеит Аԥсны ААР. Имҩаԥгаз ашьаусԥшаара-оперативтә усурақәа ирыбзоураны лаҵара 19, асааҭ 20:00 рзы даанкылан ауаҩшьра далахәын ҳәа агәҩара ззыҟоу ахаҿы.
Апрокуратура хада иазгәанаҭоит уажәазы афактқәа реидкылареи рырҵабыргреи рзы аусԥшаарақәа шымҩаԥысуа.
