АҞӘА, ԥхынгәы 24 – Sputnik, Бадри Есиава. Пицундатәи аҽырҩырҭаҿы имҩаԥысраны иҟаз аҽырыҩра ҟалаӡом атәылаҿы акоронавирустә инфекциазы ишьақәгылаз аепидемиологиатә ҭагылазаашьа иахҟьаны. Абри атәы Sputnik акорреспондент изеиҭеиҳәеит Милор Шәлымба.
Ахәаша ԥхынгәы 23 рзы ауаа ирзынарышьҭуан амҽыша ԥхынгәы 25 рзы Пицундатәи аҽырҩырҭаҿы Аҿари аспорти рзы Аҳәынҭеилакы ахантәаҩы Џьамал Гәбаз, Зых иақәиҭу аиқәԥаразы хынтә адунеи, иара убас Европа иачемпионхахьоу Денис Царгәыши, Аолимпиатә хәмаррақәа рҟны араӡны иаԥсахахьаз Саида Гәынԥҳа лгәалашәарази аԥхьахәқәа рзы аԥхынтәи аҽырыҩра шыҟало азы адырра зныз смс-қәа.
Аԥсны аԥхынра шалагаз акоронавирус еиҳа-еиҳа иалаҵәо иалагеит, аҵыхәтәантәи ҩымчыбжь рыҩнуҵҟа атәылаҿы зықь хҭыс ҿыц азгәарҭахьеит (зынӡа - 20780), зыԥсҭазаара иалҵыз рхыԥхьаӡарагьы иацлеит (285-ҩык рҟынӡа). Абри аҩыза иуадаҩу аепидемиологиатә ҭагылазаашьа иахҟьаны иаанкылан ԥхынгәы 23 рзы Абираҟ амш иазкны иазԥхьагәаҭаз аусмҩаԥгатәқәа, Хьыбла Гьерзмааԥҳа лфестиваль акәзар, ҭагалан ахь ииаргеит.
