"Кавказ иқәынхоз ажәларқәа аӡәгьы дырмазҵааит, уи иагьаҭахым ҳәа ргәы иаанагеит аҳәынҭқар дуқәа. Ажәафтәи ашәышықәсаан аҭырқәцәеи аџьамцәеи дара ртәала Кавказ ршеит. Мраҭашәара Кавказ Ҭырқәтәыла иадло, мрагылара - Џьамтәыла. Урыстәыла Кавказ иадаҳҵоит ҳәа рҽаназыршәа, аурысцәа аҭырқәцәеи аџьамцәеи иреибашьит. Азеижәтәи ашәышықәса алагамҭаз Мрагыларатәи Кавказ Урыстәыла иадлеит. Мраҭәашәаратәи Кавказ Бухаресттәи аиқәшаҳаҭрала Урыстәыла иадлеит, аха аҭырқәцәа ирзеилымкааит ирыхьыз, уи аиқәшаҳаҭрала иргаз зегьы дырхынҳәыр акәын. Аҭырқәцәеи аурысцәеи аимак ӷәӷәа рыбжьан, аха ашьҭахь Адрианопольтәи аиқәшаҳаҭрала Мраҭашәаратәи Кавказ - Анапантәи Ԥоҭынӡа - Урыстәыла иадлеит, уи аҭырқәцәа ақәшаҳаҭхеит. Уа иқәынхоз ажәларқәа маҷмызт, аха урҭ иразҵаауадаз. Дара иаразнакгьы ирзеилымкааит иҟалаз. Анаҩс асаӡқәа абираҟ анрырҭа, аурысқәа рыр аарго ианалага, уи ажәларқәа аҿагылеит, аибашьра ду ахь икылсит. Кавказтәи аибашьра дара рзы ианалага убасҟан ауп. Аҭырқәцәа арҭ адгьылқәа мап зацәыркызгьы, Адрианополь аурысқәа рнапхьы иргахьан, уантәи Сҭампылынӡа ҩымш роуп ибжьоу, Сҭампылгьы ашәарҭара ду иҭагылан. Аҭырқәцәа уаҳа изеибашьуамызт акәымзар, аиқәшаҳаҭрахь ицо иҟамызт, ианаҵаха, аурысцәа Кавказ адгьылқәа рырҭеит, уимоу, зегьы иаҳәазҭӷьы, мап ркуамызт", - ҳәа еиҭеиҳәеит Салаҟаиа.
Инеиҵыху аиҿцәажәара иара убас шәазыӡырҩыр шәылшоит арадио Sputnik Аԥсны аефир аҿы.
