Мышқәак раԥхьа Facebook ихатә даҟьаҿы Аԥсуа драматә театр актиор Гәдиса Ҭодуа атеатр иахьатәи аҭагылазаашьазы игәаанагара зныԥшуа акьыԥхьымҭа ҟаиҵеит. Уи аҟны Аԥсны ахадеи, аԥыза-министри, акультура аминистри рахь аҳәара ҟаиҵеит атеатр лассы аусура иалагартә еиԥш аҭагылазаашьа аԥҵахарц.
Шықәсык аҩнуҵҟа аспектакльқәа рыда имҩасит аамҭа, шықәсыбжак иалагӡаны атеатр аиҳабы иаҭара зыҟамлаз, актиорцәа иахьа рнапы злаку аилкааразы арадио Sputnik аефир ахь ааԥхьара рыҭан Акультуреи аҭҵаарадырреи рызҵаарақәа рзы Аԥсны ахада иабжьгаҩ Нугзар Логәуеи Аԥсуа драматә театр актиор Гәдиса Ҭодуеи.
"Аԥсуа театр ахь инеир зҭаху ахәаԥшцәа рзы иџьашьахәуп ас еиԥш ахан Аҟәа агәаны иҳаманы ашәқәа ахьарку. Актиорцәа, ахәаԥшцәа зегьы ҳзы ари трагедиоуп… Ҳаидызкыло ауаҩы даҳмоуӡеит, атеатр амеханизм аус азыруша", - иҳәеит Ҭодуа.
"Атеатр ашә акуп ҳәа аҳәара ажәа хьанҭоуп… Ԥаса ишыҟаз еиԥш аҭагылазаашьа ыҟамзаргьы, атеатр ашә акӡам… Атеатр аиҳабы дамаӡам иахьа. Уи атеатр аҩнуҵҟа ииз ҭыӡшәоуп. Аамҭала атеатр анапхгара акультура аминистр инапы ианҵоуп. Аԥсуа драматә театр атруппа аҽеиҩнашеит, убри аҟынтә аиҳабы икандидатура алхра ус имариаӡам, аиҿцәажәарақәа цоит", - иҳәеит Логәуа.
Иара агәаанагара ааирԥшит атеатр асахьаркыратә напхгаҩ ҿыц иаҭара азҵаара мызкы аҩнуҵаҟа иӡбахоит ҳәа.
Инеиҵыху аиҿцәажәара аудиофаил аҟны.
