09:50 19 Цәыббра 2019
Ишиашоу ицо аефир
  • USD64.43
  • EUR71.24
Открытый чемпионат краснодарского края и первенство города Сочи

Таитәи абокс азы аиндаҭлараҿы аԥснытәи аспортсменцәа аԥхьахәқәа ргеит

© Foto / Теймураз Гергедава
Аспорт
Икьаҿу ахьарԥш аиура
6 0 0

Таитәи абокс азы Краснодартәи атәылаҿацәи Шәача ақалақьи еидызкыло иаарту ачемпионат мҩаԥысуан ԥхынҷкәын 7-9 рзы.

АҞӘА, ԥхынҷкәын 11 – Sputnik, Бадраҟ Аҩӡба. Таитәи абокс азы Краснодартәи атәылаҿацәи Шәача ақалақьи еидызкыло иаарту ачемпионат аҟны аԥснытәи аспортсменцәа аԥыжәаратә ԥхьахәқәа ргеит ҳәа Sputnik иазеиҭеиҳәеит таитәи абокс азы Аԥснытәи афедерациа ахада Ҭеимураз Гьергьедаа.

Аԥсны ахьӡала атурнир аҿы иқәгылон фҩык аспортсменцәа. Дара зегьы амедалқәа роуит.

"Аиндаҭларақәа ҽазышәарыла ҳҽырзыҟаҳҵон, мышкахьы ҩынтә аҽазыҟаҵарақәа мҩаԥаагон хԥа-хԥа сааҭ. Ҳара иаадыруан ҳаспортсменцәа азыҟаҵара бзиа шрымаз, аха асҵәҟьа аԥыжәара роуеит ҳәа ҳақәгәыӷуамызт", — иҳәоит иара.

Сандро Ҵәыџьба ҩынтәтәи иқәгылара ашьҭахь актәи аҭыԥ никылеит, Суламита Ӡкәиаԥҳа, Григори Петикиан, Иан Каландиа аҩбатәи аҭыԥқәа ныркылеит, Леони Давиди Амҷаа ахԥатәи аҭыԥқәа ныркылеит.

"Сандро Ҵәыџьба 50 кьыла иҟаз рыбжьара дықәгылон. Ҩынтә деиндаҭлеит. Аиндаҭлара аԥҟарала 10 шықәса инаркноуп ишықәгыло аспортсменцәа. Сандро иакәзар 9 шықәса роуп ихыҵуа, аха аиҿкааҩцәа иара имаз азыҟаҵара бзиа азгәаҭаны азин ҟарҵеит дықәгыларц", — иҳәоит Гьергьедаа.

Сандрогьы ихы бзианы иааирԥшит, ҩынтәтәи иқәгылара ашьҭахь актәи аҭыԥ никылеит.

Суламита Ӡкәиаԥҳа 57 кьыла рҟынӡа зкапануаз дрыцықәгылеит, х-қәгыларак мҩаԥылгеит.

"Суламита аԥхьа дызцықәгылоз напышьашәала ақәԥаразы Урыстәыла дачемпионуп, иара убасгьы еилаԥсоу ақәԥаразы Урыстәыла дачемпионуп. Ус шакәызгьы Суламита лус налыгӡеит ишьахәӡаны. Иара убри аҽныҵәҟьа имҩаԥысит аҽа қәгыларакгьы. Иара убасҟангьы Сула лхы бзианы иаалырԥшит", — ҳәа еиҭеиҳәоит Гьергьедаа.

Ус шакәызгьы ақәгылара аихшьаалақәа рыла аԥыжәара егьи аспортсменка илырҭеит.

Ҭеимураз еиҭеиҳәеит Иан Каландиа атурнир аламҭалаз дычмазаҩын ҳәа.

"Ишора халеит. Атурнир иаламырхәра азҵаара цәырҵит, аха иара дҳаҳәеит дықәгыларц. Актәи ақәгылараҿы аиааира игеит, аҩбатәи аҟны даҵахеит", — иҳәоит иара.

Григори Петикиан атурнир аҿы ҩынтә дықәгылеит, актәи ааан аиааира игеит.

Григори Петикиан 63 кьыла иҟаз дрыцықәгылан. Иара 20 шықәса ихыҵуеит.

Гьергьедаа иара убасгьы иазгәеиҭеит 15 шықәса зхыҵуа Леон Амҷба иқәгылара.

"Леон диндаҭлон Бриансктәи аспортсмен. Леон ихы бзианы иааирԥшит. Аиааирагьы игеит. Аҩбатәи ақәгылараан Кавказ ахраҿаз ачемпион, Адлертәи аспортсмен дицықәгылеит. Убасҟан иара даҵахеит, ахԥатәи аҭыԥгьы ааникылеит", — ҳәа еиҭеиҳәоит Гьергьедаа.

Леон иашьа Давид 13 шықәса ихыҵуеит. Ҩынтәтәи иқәгылара ашьҭахь ахԥатәи аҭыԥ никылеит.

"Сара ҭабуп ҳәа расҳәар сҭахуп атурнир аиҿкааҩцәа: Краснодартәи атәылаҿацә аҟны таитәи абокс азы Афедерациа ахада Расул Муртазалиев, жәларбжьаратәи акласс аспорт азҟаза Руслан Нагабедиан, Краснодартәи атәылаҿацә аспорт азҟаза Артиом Корниенко, аиндаҭлара аӡбаҩ Владимир Коваленко", — иҳәеит иара.

Атурнир иалахәын 340-ҩык аспортсменцәа –Аԥсны, Ростов, Краснодар, Ставрополь, Ҟрым, Новороссиск, Даӷьстан, Чечентәыла, Ермантәыла, Дагомыс, Лазаревское, Шәача, Адлер, Нхыҵи Аахыҵи Уаԥстәылақәа рҟынтәи.

Ихадоу атемақәа