АҞӘА, цәыббра 1— Sputnik. Донецктәи жәлар рреспублика Ахада Александр Захарченко иҭархара азыԥхьагәаҭан иагьымҩаԥган Украина амаҵзура ҷыдақәа рыла ҳәа аанацҳауеит РИА Новости. Уи атәы ҭелла иҳәеит ДЖәР Ахада иабжьагаҩ Александр Казако.
"Хара имгакәа иаҳҳәар ҳалшоит аус еиҿызкааз ихьӡ", — иҳәеит иара.
Александр Захарченкои ихьчаҩи ҭахеит нанҳәа 31 ауха, аресторан "Сепар" аҿы иҟалаз аԥжәара иахҟьаны. Ахәышәтәырҭахь днагоуп алагалақәеи ашәахтәқәеи рминистр Александр Тимофеев.
Урыстәыла Адәныҟатәи аусқәа рминистрра Александр Захарченко ишьра терактуп ҳәа ахнаҳәааит, ацхыраара аҭахны иҟалар адгылара хымԥада ишыҟарҵо рҳәеит.
Урыстәыла Ахада Владимир Путин адашшылара ҟаҵо иҳәеит "Донбасс дапатриот дун, дхаҵа ӷьеҩын" ҳәа.
