АҞӘА, хәажәкыра 20 - Sputnik. ЕАА ахада Дональд Трамп Бразилиа ахада Жаиро Болсонару иԥылара ашьҭахь имҩаԥысуаз апресс-конференциаҿы ажурналистцәа дрыҿцәажәо Венесуела арратә интервенциа аҭыԥ аиур алшоит ҳәа иҳәеит. Абри атәы аанацҳауеит РИА Новости.
"Алшарақәа зегьы аартуп", - иҳәеит иара.
Боливариантәи Ареспублика аоппозициа аԥхьагыла Хуан Гуаидо ихаҭарнакцәа ЕАА иҟоу атәыла адипломатиатә усҳәарҭақәа ныркылеит. Венесуела Аминистрцәа реилазаараҿ иазгәарҭеит адипломатиатә усҳәарҭақәа нызкылаз америкатәи аиҳабыра ирагентцәоушәа иԥхьаӡатәуп ҳәа.
Урыстәыла адәныҟатәи аусқәа рминистр ихаҭыԥуаҩ Сергеи Риабков аҳәамҭа ҟаиҵеит Урыстәыла абри аус аҿы Америка ахымҩаԥгашьаз агәы аҽаннаҵоит алҵшәақәа акыр ишәарҭахар алшоит ҳәа. Иара иажәақәа рыла ЕАА ахымҩаԥгашьа Венесуелатәи акризис еиҳагьы иӷыӷнаркуеит.
Ажьырныҳәа 21 рзы Венесуела иахьатәи ахада Николас Мадуро иҿагыланы Каракас ақәгыларақәа ирылагеит. Апарламент аспикер Хуан Гуаидо ажьырныҳәа 23 рзы атәыла ахадас ихы рылеиҳәеит.
Гуаидо истатус адгылара арҭеит: ЕАА, Канада, Аргентина, Бразилиа, Чили, Колумбиа, Коста-Рика, Гватемала, Гондурас, Панама, Парагваи, Перу, Қырҭтәыла.
Урыстәыла Мадуро адгылара инаҭоит аконституциатә шьаҭа зманы иҟоу атәыла ахадак иҳасаб ала.
Европатәи атәылақәа зеижә: Испаниа, Португалиа, Германиа, Великобританиа, Даниа, Нидерланды, Франциа, Венгриа, Австриа, Финлиандиа, Бельгиа, Лиуксембург, Чехиа, Латвиа, Литва, Естониа, Польша, Швециа, Хорватиа, Македониа, Румыниа жәабран 4 рзы рнапы еицаҵарҩит адеклорациа, иазгәарҭеит Хуан Гуаидо аамҭалатәи Венесуела ахада ҳәа дшазхарҵо азы.
