АҞӘА, рашәара 5 - Sputnik. Урыстәыла Атәылахьчара аминистр Сергеи Шоигу аҳәамҭа ҟаиҵеит ИАР аҳәаақәа рҿы арра-политикатә ҭагылазаашьа шәарҭоуп ҳәа. Абри атәы аанацҳауеит РИА Новости.
"ИАР аҳәаақәа рҿы арра-политикатә ҭагылазаашьа шәарҭоуп. Акыр аибарххарақәа амоуп. Иубаратәы иҟоуп ИАР асуверенитет ишақәыӷәӷәо. Ихьыԥшым атәылақәа реидгыла - ИАР атәылақәа ртәылахьчара аминистрцәа рформат иалнаршоит аинырра адиапазон арҭбаара, аконструктивтә диалог амҩаԥгара. Иахьатәи ҳаилатәарагьы абри амҩаҿы шьаҿак ԥхьаҟа уназго ауп", - иҳәеит Шоигу.
ИАР атәылақәа рырратә усбарҭақәа русеицура аҿиара аиуеит НАТО активла аҽырҭбаараан, астратегиатә еиқәшаҳаҭрақәа реиҭахәаԥшраан ҳәа иҳәеит иара.
"Атәылахьчара аминистррақәа рхеилак арратә усеицура шьаҿа-шьаҿала иарҿиоит. Ари аус мҩаԥысуеит иҭышәынтәалам агеополитикатә ҭагылазаашьа аамҭаан", - иҳәоит Шоигу.
Аминистр ихәшьарала, ЕАА адунеи зегьы аҿы арратәи аекономикатәи қәыӷәӷәара ҟарҵоит, НАТО акәзар, аинформациатә қәыӷәӷәара мҩаԥнагоит, амч ахархәарала атәылақәа аршәоит.
Шоигу иара убасгьы акыр ашәарҭара аланы иԥхьаӡоит жәларбжьаратәи атерроризм "амиграциа".
"Жәларбжьаратәи атерроризм аотриадқәа рыспонсорцәа рыцхыраарала регионк аҟынтәи даҽа регионк ахь ииасуеит атәылақәа ршәарҭадара есааира иҵшәаауа", - иҳәеит Шоигу.
Ихьыԥшым атәылақәа реидгыла - ИАР атәылақәа ртәылахьчара аминистрцәа реилатәара мҩаԥысуеит рашәара 5 рзы, Анапа.
![D:\](https://cdn1.img.sputnik-abkhazia.info/images/102828/61/1028286158.jpg "D:\")
