АҞӘА, ажьырныҳәа 18 - Sputnik. М.П. Чумаков ихьӡ зху Афедералтә ҭҵаарадырратә Центр аус зыднаулаз коронавирус хызҽуа алаҵа ахархәарахь инеиуеит хәажәкырамзазы ҳәа аанацҳауеит РИА Новости, аусбарҭа аҭҵаарадырратә ҿиаразы адиректор Константин Чернов иҳәамҭа ҵаҵӷәыс иҟаҵаны.
Иахьазы Ацентр аклиникатә ԥышәарақәа аҩбатәи реикәшара мҩаԥнагоит. Алаҵа иалоу ахәарҭара хатәгәаԥхарала издызкыло рыла ишьақәыргылахоит.
"Алаҵа хәажәкырамза шыҟоу ахархәарахь инашьҭхароуп", - ҳәа иҳәеит Чернов аканал "Россия 1" аефир аҿы.
Иара игәаанагарала, алаҵа ҿыц еиҳа комплексла еиҿкаахоит.
"Уажәазы авирус иадбалоуп 50 инарзынаԥшуа еиуеиԥшым ахыӡқәа. Иара аилазаара зегь ацәеижь ианаҳзадгала, еиҳа комплексла ахьчара ҳалшап ҳәа ҳгәыӷуеит", - ҳәа иҳәеит иара.
М.П. Чумаков ихьӡ зху Афедералтә ҭҵаарадырратә Центр аус зыднаулаз коронавирус хызҽуа алаҵаҿы ахархәара аҭоуп аинактивиртә вирус SARS-CoV-2. Уи аҿкратә ҟазшьақәа ацәырӡуп, аха аиммунтә реакциа аанарԥшуеит.
Уажәазы Урыстәыла ауаа ирыдыргалоит алаҵақәа ҩба: Гамалеиа ихьӡ зху аепидемиологиеи амикробиологиеи Рцентр аус зыднаулаз "Спутник V", новосибирсктәи Ацентр "Вектор" аус зыднаулаз "ЭпиВакКорона".
